ەلىمىزدىڭ 4 وبلىسىنا ۇلتتىق ۇلان ساربازدارى كومەككە اتتاندى
استانا. KAZINFORM - قوستاناي جانە سولتۇستىك قازاقستان وبلىستارىنداعى حالىقارالىق جانە رەسپۋبليكالىق ماڭىزى بار اۆتوجولداردىڭ 4300 مەترىن ەرىگەن قار سۋى باستى.
اقتوبە، اتىراۋ، قوستاناي جانە سولتۇستىك قازاقستان وبلىستارىندا جالپى ۇزىندىعى 463 كيلومەتر بولاتىن رەسپۋبليكالىق ماڭىزى بار 8 اۆتوموبيل جولىنىڭ ۋچاسكەلەرىندە قوزعالىس شەكتەلگەن.
جوعارىدا اتالعان اۋدانداردىڭ تۇرعىندارىنا گۋمانيتارلىق كومەك، اتاپ ايتقاندا اۋىز سۋ، نان، گيگيەنالىق قۇرالدار شۇعىل قاجەت. مۇندا ق ر ۇلتتىق ۇلانىنىڭ اسكەري قىزمەتشىلەرى - ۇشاقتار مەن تىكۇشاقتاردىڭ ۇشقىشتارى حالىققا كومەككە كەلدى.
قازىرگى ۋاقىتتا ۇشقىشتار باسقا ايماقتاردىڭ تۇرعىندارى، كورپوراتسيالار، سونداي-اق كورشى مەملەكەتتەردەن جينالعان 140 تونناعا جۋىق گۋمانيتارلىق جۇكتى جەتكىزدى. ءوز كەزەگىندە، ۇلاندىقتار 600 توننادان استام جۇك ءتۇسىردى. گۋمانيتارلىق كومەكتىڭ نەگىزگى بولىگى اقتوبە، اتىراۋ، باتىس قازاقستان، قوستاناي جانە سولتۇستىك قازاقستان وبلىستارىنا جىبەرىلدى.
بۇگىنگى كۇنى اسكەري قىزمەتشىلەر پوليتسيا قىزمەتكەرلەرىمەن جانە قۇتقارۋشىلارمەن بىرلەسىپ سۋ تاسقىنى سالدارىن جويۋ جۇمىستارىن جالعاستىرۋدا، سونداي-اق سۋ تاسقىنىنا قارسى ءىس-شارالار مەن اۆاريالىق-قۇتقارۋ جۇمىستارى، ەرىگەن سۋلاردى ايداۋ، ينەرتتى ماتەريالدارى بار قاپشىقتاردى توسەۋ، سۋ ايدىندارىنىڭ جاعالاۋدى نىعايتۋ جۇمىستارى، كانالدار مەن ارىق جۇيەلەرىن تازارتۋ، ادامداردى قاۋىپسىز ورىندارعا كوشۋ جونىندە قۇلاقتاندىرۋ جانە ەۆاكۋاتسيالاۋ جۇرگىزىلۋدە.
ماسەلەن، اتىراۋ وبلىسىندا 5546 (اتىراۋ ق.) جانە 5451 (قاراعاندى ق.) اسكەري بولىمدەرىنەن 600 گە جۋىق قۇقىقتىق ءتارتىپ اسكەرى تارتىلدى. بۇدان باسقا، 6506 اسكەري ءبولىمىنىڭ (شىمكەنت ق.) 300 اسكەري قىزمەتشىسى جانە 5547 اسكەري ءبولىمىنىڭ ( قىزىلوردا ق.) جەكە قۇرامىنىڭ 200 ادامى باتىس قازاقستان وبلىسىندا جاعالاۋدى نىعايتۋ جۇمىستارىنا، قاپشىقتاردى دايىنداۋعا جانە سالۋعا كومەكتەسەدى. سونىمەن بىرگە، 5517 اسكەري ءبولىمىنىڭ (ورال ق.) 80 اسكەري قىزمەتشىسى پاترۋلدىك بەكەتتە قىزمەت اتقارادى. تاعى 300 گە جۋىق سارباز سۋ تاسقىنىنا قارسى ءىس-شارالاردا جەرگىلىكتى حالىققا كومەك كورسەتەدى.
6655 اسكەري ءبولىمىنىڭ (اقتوبە ق.) 400 دەن استام اسكەري قىزمەتشىسى پاترۋل بەكەتىندە قىزمەت اتقارادى. ۇلاندىقتار كۇندىز-ءتۇنى سۋ باسقان اۋماقتاردا بولادى، ولار تۇرعىنداردىڭ ۇيلەرىندە مۇلىكتەرىنىڭ جوعالماۋىن قاداعالاۋدا. قاۋىپسىزدىك ماقساتىندا ساربازدار ازاماتتاردى سۋ باسقان ۇيلەرگە جىبەرمەيدى. اسكەري قىزمەتشىلەر توناۋ ارەكەتتەرىنىڭ الدىن الۋ ءۇشىن بار كۇشىن سالادى.
سۋ تاسقىنى سالدارىن جويۋعا قوستاناي جانە سولتۇستىك قازاقستان وبلىستارىنىڭ قالالارى مەن كەنتتەرىندە 6697 (قوستاناي ق.) جانە 6637 (پەتروپاۆل ق.) اسكەري بولىمدەرىنىڭ اسكەري قىزمەتشىلەرى، ق ر ۇلتتىق ۇلانى اكادەمياسىنىڭ كۋرسانتتارى بەلسەندى قاتىسادى. ولارعا ەلوردالىق جەدەل بريگادانىڭ ءتارتىپ ساقشىلارى كومەككە جىبەرىلدى. سولتۇستىك ايماقتارداعى ۇلتتىق ۇلاننىڭ كۇشتەرى 400 دەن استام ادامدى قۇرايدى.
«جالپى، سۋ باسقان وڭىرلەردە سۋ تاسقىنىنىڭ الدىن الۋ جانە جويۋ ءۇشىن پوليتسەيلەرمەن، قۇتقارۋشىلارمەن جانە ەرىكتىلەرمەن بىرلەسىپ سۋ تاسقىنىنا قارسى ءىس-شارالارعا بەلسەندى قاتىساتىن 3000 نان استام اسكەر تارتىلدى. ۇلاندىقتار 120 دان استام اۆتوكولىك تەحنيكاسىن پايدالانادى، 1769 ادام ەۆاكۋاتسيالاندى، 1 ميلليون 101 مىڭ قاپ دايىندالىپ، توسەلدى»، - دەلىنگەن ق ر ۇلتتىق ۇلانىنىڭ باسپا ءسوز قىزمەتى تاراتقان اقپاراتتا.
