ەلىمىزدە پورنوگرافيا تاراتۋدىڭ 6 فاكتىسى تىركەلدى - ءى ءى م رەسمي وكىلى

ىشكى ىستەر مينيسترلىگىنىڭ رەسمي وكىلى شىڭعىس الەكەشەۆتىڭ مالىمەتىنشە، 13-15-تامىز ارالىعىندا رەسپۋبليكا اۋماعىندا «Anti-fraud» جەدەل-الدىن الۋ ءىس-شاراسى ۇيىمداستىرىلعان.

وسى كەزەڭدە «ءىزىن سۋىتپاي» 178 قىلمىس اشىلعان. اتاپ ايتساق:

- اۆتورلىق جانە ساباقتاس قۇقىقتاردى بۇزۋ (ق ك 198-بابى) - 3 فاكت؛
- اقپاراتقا زاڭسىز قول جەتكىزۋ (ق ك 205-بابى) - 1 فاكت؛
- ابونەنتتىك قۇرىلعىنىڭ سايكەستەندىرۋ كودىن زاڭسىز وزگەرتۋ (ق ك 213-بابى) - 4 فاكت؛
- پورنوگرافيانى تاراتۋ (ق ك 311-بابى) - 6 فاكت؛
- ارنايى تەحنيكالىق قۇرالداردى تاراتۋ (ق ك 399-بابى) - 2 فاكت؛
- IT- تەحنولوگيالاردى پايدالانا وتىرىپ ۇرلىق جاساۋ (ق ك 188-بابى) - 5 فاكت؛
- ينتەرنەت پايدالانۋشىلارىنا قاتىستى الاياقتىق - 157 فاكت.

«سونىمەن قاتار، پوليتسيا قىزمەتكەرلەرى بۇرىن جاسالعان 328 قىلمىستى اشتى. ەركىن اينالىمدا جۇرگەن 485 تىيىم سالىنعان ءونىم تاركىلەندى. الماتى قالاسىنداكورشىلەس ەلدىڭ 24 جاستاعى ازاماتى ۇستالدى. ول پاتەردە SIM-box قۇرىلعىسىن ورناتىپ، ەل اۋماعىندا الاياقتىق قوڭىراۋ شالۋ قىزمەتىن ۇسىنعان. سونداي-اق، سەمەي قالاسىندا ۆيرتۋالدى ابونەنتتىك نومىرلەردى تىركەۋگە ارنالعان GSM-box اپپاراتۋراسىن جالدامالى پاتەردە ورناتىپ، ۇيالى بايلانىس جەلىلەرىنە قوسقان تاعى ءبىر شەتەلدىك ۇستالدى. 22 جاستاعى جىگىت Telegram-ارنا ارقىلى كۋراتوردان تۇسكەن نۇسقاۋلاردى ورىنداعان. جالپى، ءىس-شارانى وتكىزۋ كەزىندە رەسپۋبليكانىڭ ءۇش قالاسىندا بارلىعى 4 SIM-box قۇرىلعىسى جانە 6 مىڭعا جۋىق sim-كارتا تاركىلەنىپ، جويىلدى. بارلىق فاكتىلەر بويىنشا تەرگەۋ جۇرگىزىلىپ جاتىر. كۇدىكتىلەردىڭ ارەكەتىنەن زارداپ شەككەن ادامدار انىقتالىپ جاتىر»، - دەدى ش. الەكەشيەۆ.

ونىڭ ايتۋىنشا، سوڭعى كەزدە الاياقتار مەملەكەتتىك ورگاندار مەن ءىرى جەكە ۇيىمدار باسشىلارىنىڭ اتىنان جالعان اككاۋنتتار اشىپ، ادامداردى الداۋ فاكتىلەرى جيىلەپ كەتكەن. وكىنىشكە قاراي، تۇرعىندارعا ءتۇسىندىرۋ جۇمىستارى جۇيەلى جۇرگىزىلسە دە، ءالى كۇنگە دەيىن الاياقتاردىڭ قۇرىعىنا تۇسكەندەر ازايماي تۇر.

اۆتور
ورالحان قوجانوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى