ەلىمىزدە ورمان ءورتىن ەرتە انىقتايتىن جۇيە ەنگىزىلىپ جاتىر
استانا. KAZINFORM - قازاقستاندا ورمان ءورتىن ەرتە انىقتاۋ اۆتوماتتاندىرىلعان جۇيەسى ەنگىزىلىپ جاتىر. بۇل تۋرالى ق ر ەكولوگيا جانە تابيعي رەسۋرستار ۆيتسە-ءمينيسترى نۇرلان قۇرمالايەۆ ايتتى.
- جۇيە ورمان القاپتارىن ۇزدىكسىز باقىلاۋدى قامتاماسىز ەتەدى. ارنايى وپتيكالىق داتچيكتەر مەن دەرەكتەردى تالداۋ الگوريتمدەرى ءارتۇرلى جاعدايلاردا، سونىڭ ىشىندە تاۋلار مەن دالادا، ءتىپتى ۇزاق قاشىقتىقتا دا ءورتتى اۆتوماتتى تۇردە انىقتايدى. جۇيەگە جاساندى ينتەللەكت بىرىكتىرىلگەن، ول دەرەكتەردى تىركەپ، بىردەن اقپارات ورتالىعىنا جىبەرەدى. جۇيە ەنگىزىلگەن ۋچاسكەلەردە بەينەكامەرالار، دەرەكتەردى بەرۋگە ارنالعان انتەننالار، سونداي-اق دەرەكتەردى وڭدەۋ جانە ەلەكترمەن جابدىقتاۋ جۇيەسى ورناتىلعان، - دەدى ول و ك ق الاڭىندا.
ۆيتسە-مينيستر اتاپ وتكەندەي، جۇيە «ەرتىس ورمانى» تابيعي رەزەرۆاتىندا جانە «كوكشەتاۋ» ۇلتتىق پاركىندە ىسكە قوسىلدى. وسىعان ۇقساس جۇيەلەر «مەدەۋ» وڭىرلىك پاركىندە، «بۋراباي» ۇلتتىق پاركىندە، قوستاناي، باتىس قازاقستان جانە سولتۇستىك قازاقستان وبلىستارىنىڭ ورمان مەكەمەلەرىندە ەنگىزىلدى.
- ءورت شىعۋ قاۋپى باسىم ورمان شارۋاشىلىقتارى انىقتالدى، وندا ق ر ت ج م كوماندالىق ورتالىعىنا قوسا وتىرىپ، جۇيەنى كەزەڭ- كەزەڭىمەن ماسشتابتاۋ جوسپارلانۋدا. سونداي-اق زاڭ بۇزۋشىلىقتاردىڭ الدىن الۋ جانە ادامداردىڭ كەلىپ-كەتۋىن ساراپتاۋ ءۇشىن ىلە-الاتاۋ، شارىن، سايرام-وگەم، باياناۋىل، كولساي كولدەرى مەملەكەتتىك ۇلتتىق تابيعي پاركتەرىنىڭ اۋماعىنداعى باقىلاۋ- وتكىزۋ پۋنكتتەرى اۆتوماتتاندىرىلدى، - دەدى ۆيتسە-مينيستر نۇرلان قۇرمالايەۆ.
ەلىمىزدە قورشاعان ورتا مەن تابيعي رەسۋرستاردىڭ جاي-كۇيى جونىندەگى ۇلتتىق دەرەكتەر بانكى قۇرىلدى.
ودان بولەك، بيىل 5 مىڭعا جۋىق زاڭسىز قوقىس ورىندارى انىقتالدى.
ەربول جانات
