ەلىمىزدە Tasqyn سۋ بولجاۋ جۇيەسى قولدانىسقا بەرىلدى
استانا. KAZINFORM - ەلىمىزدە Tasqyn سۋ تاسقىنىن بولجاۋ جانە مودەلدەۋ جۇيەسى وندىرىستىك قولدانىسقا بەرىلدى. سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ سۋ تاسقىنى كەزەڭىنە دايىندىق ماسەلەلەرى بويىنشا اپپارات كەڭەسىن وتكىزدى.
مينيسترلىكتىڭ باسپاءسوز قىزمەتىنىڭ حابارلاۋىنشا، بۇگىنگى تاڭدا وزەندەردىڭ 128 ۋچاسكەسىندەگى 142 سۋ بەكەتى بويىنشا سۋ تاسقىنىن مودەلدەۋ جۇرگىزىلەدى. «قازسۋشار» فيليالدارى مەن باسسەيندىك ينسپەكتسيالاردىڭ 114 مامانى سۋ بەكەتتەرى بويىنشا دەرەكتەرگە كۇندەلىكتى تالداۋ جاسايدى جانە ونى جۇيەگە ەنگىزەدى.
Tasqyn جۇيەسى جاھاندىق GloFAS سۋ تاسقىنى جونىندە ەسكەرتۋ جۇيەسىنە بىرىكتىرىلگەن. Tasqyn 2025 -جىلدىڭ سۋ تاسقىنى كەزەڭىنە سوڭعى بولجامدى ناۋرىز ايىنىڭ باسىندا بەرەدى.
«سۋ تاسقىنىنا ەل ىشىندەگى دايىندىقتان بولەك، ءبىز كورشى مەملەكەتتەردەگى ارىپتەستەرىمىزبەن دە تۇراقتى بايلانىستامىز. اقپارات الماسۋ جەدەل جۇرەدى. كوكتەمگى سۋ تاسقىنىن قابىلداۋعا قويمالاردا بوس ورىن دايىنداۋ ءۇشىن سۋ تاستاۋ جۇمىسى جالعاسىپ جاتىر. بۇگىنگى تاڭدا ەلىمىزدىڭ سۋ قويمالارى 13 ميلليارد تەكشە مەتر سۋ قابىلداي الادى»، - دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
