ەلىمىزدە تاعى ەكى اۋەجاي سەنىمگەرلىك باسقارۋعا بەرىلمەك

الدىمەن كولىك ءمينيسترىنىڭ ورىنباسارى اۋەجايلار جەكە مەنشىككە ەمەس، سەنىمگەرلىك باسقارۋعا بەرىلەتىنىن ناقتىلادى.

- ءبىز تاجىريبەسى بار حالىقارالىق كومپانيالاردى ينۆەستيتسيا قۇيۋعا، قارجىلىق-ەكونوميكالىق مودەلدى ازىرلەۋگە جانە دامۋ ستراتەگياسىن جاساۋ ءۇشىن تارتامىز. بۇل كومپانيالار 5، 10، 15، 20 جىلدىق جوسپارلارىن ۇسىنادى، ءبىز سونىڭ نەگىزىندە ءوز ستراتەگيامىزدى قۇرامىز. بۇل قالىپتى الەمدىك تاجىريبە. قازىر تۇركىستان جانە قىزىلوردا اۋەجايلارىن سەنىمگەرلىك باسقارۋعا بەرۋ جوسپارلانىپ وتىر، — دەدى ماقسات قالياقپاروۆ ب ا ق وكىلدەرىنىڭ ساۋالىنا جاۋاپ بەرە تۇرىپ.

سونداي-اق، ۆيتسە-مينيستر اتالعان ەكى اۋەجايدى ۆەتنامدىق Sovico Group كومپانياسىنا سەنىمگەرلىك باسقارۋعا بەرىلەتىنىن تىلگە تيەك ەتتى.

— Sovico Group كومپانياسى قازاقستان نارىعىنا كىرىپ، Qazaq Air اۋە كومپانياسىن ساتىپ الىپ، 20 دان استام ۇشاق اكەلۋدى جوسپارلاپ وتىر. كومپانياعا تۇركىستان جانە قىزىلوردا قالاسىنىڭ اۋەجايى ۇسىنىلدى، قازىر سەنىمگەرلىك باسقارۋ ماسەلەسى تالقىلانۋدا. ارينە، باسىمدىق باقىلاۋ مەن قاۋىپسىزدىككە بەرىلەدى. بىزدە قۇرامىنا 193 ەل كىرەتىن حالىقارالىق ازاماتتىق اۆياتسيا ۇيىمىنىڭ (ICAO) نورمالارىنا نەگىزدەلگەن قاتاڭ تالاپتار بار. ءبىز سول تالاپتاردى ورىنداپ «قارا تىزىمنەن» شىقتىق. ينۆەستورلار ICAO ستاندارتتارىن ساقتاۋعا مىندەتتى جانە بۇل نەگىزگى شارت، — دەيدى ول.

ايتا كەتەيىك، بۇگىن ەلوردادا «كولىك جانە لوگيستيكا نارىعى» تاقىرىبىندا VI حالىقارالىق كونفەرەنتسياسى جانە GLOBAL Avia DAY اۋە تاسىمالدارىن دامىتۋ جونىندەگى I حالىقارالىق فورۋمى ءوتىپ جاتىر.

ەسكە سالا كەتسەك، بيىل مامىردا ۆەتنامدىق SOVICO كومپانياسىمەن Qazaq Air اۋە كومپانياسىن ساتىپ الۋ تۋرالى ءتيىستى قۇجاتقا قول قويىلعان ەدى. ال كۇزدە Qazaq Air- ءدى ساتۋ ءراسىمى نەگە اياقتالماي جاتقانى بەلگىلى بولدى.

سونداي-اق، جەلتوقساندا پاۆلودار اۋەجايى اۋكسيونعا شىعارىلاتىنى، ياعني جەكە مەنشىككە بەرىلەتىنى تۋرالى حابارلاعان بولاتىنبىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى