ەلىمىزدە سۋتەگى ەنەرگەتيكاسىن دامىتۋدىڭ 2030 -جىلعا دەيىنگى تۇجىرىمداماسى بەكىتىلدى
استانا. قازاقپارات - 2024 -جىلعى 27-قىركۇيەكتە قازاقستان رەسپۋبليكاسى ەنەرگەتيكا ءمينيسترىنىڭ № 342-بۇيرىعىمەن ەلدە سۋتەگى ەنەرگەتيكاسىن دامىتۋدىڭ 2030 جىلعا دەيىنگى تۇجىرىمداماسى بەكىتىلدى.
اتالعان قۇجات ەلىمىزدەگى سۋتەگى ەنەرگەتيكاسى سەكتورىن دامىتۋ ءۇشىن نەگىزگى باعدار بولادى جانە جاھاندىق ەكولوگيالىق ماسەلەلەردى شەشۋگە ەلەۋلى ۇلەس قوسادى.
تۇجىرىمداماعا ۇلتتىق كومىرتەگى بەيتاراپتىعى ماقساتىنا قول جەتكىزۋ جانە پارنيكتىك گازدار شىعارىندىلارىن قىسقارتۋ جونىندەگى حالىقارالىق مىندەتتەمەلەردى ورىنداۋ سياقتى ماڭىزدى باعىتتار كىرەدى. نەگىزگى نازار سۋتەگى تەحنولوگيالارىن دامىتۋعا جانە وسى سالاداعى پيلوتتىق جوبالاردى ىسكە اسىرۋ ءۇشىن ينۆەستيتسيالار تارتۋعا اۋدارىلادى. تۇجىرىمدامادا كوزدەلگەن پيلوتتىق جوبالار وزىق تەحنولوگيالاردى ەنگىزۋگە جانە ەلدىڭ ەنەرگەتيكا سەكتورىندا جاڭا مۇمكىندىكتەر جاساۋعا ىقپال ەتەدى.
تۇجىرىمدامانى ءساتتى جۇزەگە اسىرۋ قازاقستاعا الەمدىك ەنەرگەتيكا ارەنادا ءوز پوزيتسيالارىن نىعايتۋعا مۇمكىندىك بەرەدى جانە كومىرتەكتى بەيتاراپتىققا جەتۋ جولىنداعى ماڭىزدى قادام بولادى دەپ كۇتىلۋدە.
سۋتەگى ەنەرگەتيكاسىن دامىتۋ قازاقستاننىڭ جاسىل ەكونوميكاعا كوشۋ جانە تۇراقتى دامۋ ستراتەگياسىنىڭ ماڭىزدى ەلەمەنتى سانالادى.
تۇجىرىمداما جوباسىمەن مىنا سىلتەمە بويىنشا تانىسۋعا بولادى.
