ەلىمىزدە ساربازدارعا كرەديت بەرۋگە تولىق تىيىم سالۋ ۇسىنىلدى
قازاقستان پارلامەنتى ءماجىلىسىنىڭ دەپۋتاتى ەرلان ستامبەكوۆ ساربازدارعا كرەديت بەرۋگە تىيىم سالۋدى ۇسىندى، دەپ حابارلايدى Kazinform.
«اسكەري قىزمەتشىلەرگە كەلسەك، كرەديت الۋعا موراتوري ەنگىزۋدى ۇسىنامىز. بۇل جەردە ماسەلە ساربازدارعا قاتىستى بولىپ وتىر. ياعني، ءبىز مەرزىمدى قىزمەت ساربازدارىنا نەسيە بەرۋگە تولىق تىيىم سالعىمىز كەلەدى. نەگە؟ ساربازعا اسكەري مىندەتىن وتەپ جۇرگەندە ماجبۇرلەپ كرەديت العىزۋ فاكتىلەرى بار. ءبىز اسكەر ساربازداردى ءتيىستى دەڭگەيدە قامتىپ وتىر دەپ سەنەمىز. سوندىقتان ولاردىڭ كرەديت الۋىنا نەگىز جوق»، - دەدى ەرلان ستامبەكوۆ ب ا ق وكىلدەرىنىڭ ساۋالىنا جاۋاپ بەرە تۇرىپ.
ايتا كەتەيىك، زاڭ شىعارۋ قىزمەتى ماسەلەلەرى جونىندەگى ۆەدومستۆوارالىق كوميسسيانىڭ وتىرىسىندا «اكىمشىلىك قۇقىق بۇزۋشىلىق تۋرالى كودەكسكە كرەديت بەرۋ كەزىندە تاۋەكەلدەردى ازايتۋ جانە قارىز الۋشىلاردىڭ قۇقىقتارىن قورعاۋ ماسەلەلەرى بويىنشا تولىقتىرۋلار ەنگىزۋ تۋرالى» جانە «كرەديت بەرۋ كەزىندە تاۋەكەلدەردى ازايتۋ جانە قارىز الۋشىلاردىڭ قۇقىقتارىن قورعاۋ ماسەلەلەرى بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى» زاڭ جوبالارى بويىنشا ۇكىمەتتىڭ قورىتىندىلارى تالقىلاندى.
