ەلىمىزدە رەزەرۆتەگى العاشقى اسكەري قۇرامالار 2025 -جىلدان باستاپ قۇرىلادى - ەرمۇرات باپي
15 - قاراشا كۇنى ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە رەزەرۆتەگى قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا قارالادى، دەپ حابارلايدى Kazinform.
قۇجاتتى ەلىمىزدىڭ قورعانىس مينيسترلىگى ازىرلەدى. بىلتىر جەلتوقساندا ءماجىلىس قاراۋىنا ەنگىزىلگەن وسى زاڭ جوباسىن دەپۋتاتتار جۇمىس توبىنىڭ وتىرىستارىندا ەگجەي- تەگجەيلى تالقىدان وتكىزدى. وسى ورايدا دەپۋتات ەرمۇرات باپي بۇل قۇجاتتىڭ نەگىزگى ماقساتىنا قاتىستى تۇسىنىك بەردى.
«جامان ايتپاي، جاقسى جوق، ەگەر دە ەلىمىزگە الدەبىر قاتەر تونگەن جاعدايدا، بۇرىنعىداي موبيليزاتسياعا شاقىرىپ، ودان كەيىن اسكەرگە شاقىرىلعان ازاماتتىڭ كيىم- كەشەگىن بەرىپ، ولاردى دايىندىقتان وتكىزۋ، قارۋ- جاراقپەن قامتاماسىز ەتۋ قادامدارى تىم ۇزاق پروتسەسس. ال رەزەرۆتەگى اسكەرلەر - بۇل اسكەردىڭ جاڭا ءتۇرى. ولار بەلگىلەگەن مەرزىمدە جاۋىنگەرلىك دايىندىقتان ءوتىپ تۇرادى. تۇراقتى تۇردە ءتيىستى وقۋ- جاتتىعۋ جيىندارى ۇيىمداستىرىلادى. وسىنىڭ ناتيجەسىندە دايىندىقتان وتكەندەردى ۋاكىلەتتى ورگان ءتيىستى اسكەري بولىمشەلەرگە بىردەن باعىتتايدى»، - دەدى ە. باپي.
اتاپ ايتقاندا، رەزەرۆتەگى قىزمەتكە تارتىلعاندار ۇرىسقا دايىن قۇرام رەتىندە جاساقتالادى. بۇل رەزەرۆتەگى قىزمەت قىسقا مەرزىمدە ءتيىستى اسكەري بولىمگە كەلۋگە، سونداي- اق قويىلعان مىندەتتەردى ورىنداۋعا دەرەۋ كىرىسۋگە دايارلانعان ازاماتتاردىڭ ساقاداي- ساي تۇرۋىنا سەپتىگىن تيگىزەدى.
«وسى زاڭ جوباسىن ازىرلەۋدىڭ نەگىزگى ماقساتىنا توقتالساق، قازىرگى الەمدەگى گەوساياسي جاعداي كەزىندە ەلىمىزدىڭ قورعانىس قابىلەتىن نىعايتۋعا باعىتتالعان. بۇل تۇرعىدا رەزەرۆتەگى ازاماتتار ارقىلى اسكەر قاتارىن جىلدام تولتىرۋ قاراستىرىلعان. ولار الدىن الا دايىندىقتان وتەدى. رەزەرۆتەگىلەردى جۇمىلدىرۋ قاجەت بولسا، دايىندىقتان وتكەندەر ءبىرىنشى دابىلدان كەيىن ءوزىنىڭ اسكەري بولىمىنە كەلىپ، ءوزى جاۋاپتى اسكەري بەكەتكە بارادى نەمەسە اسكەري تەحنيكاسىنا وتىرادى»، - دەدى دەپۋتات.
رەزەرۆتەگى قىزمەتكە تارتىلعاندارمەن ەرىكتى تۇردە كەلىسىمشارت جاسالادى. سونىمەن قاتار، زاڭ جوباسىندا رەزەرۆتە تۇرعان ادام مەن جۇمىس بەرۋشى اراسىندا قاتىناستاردى رەتتەۋ تەتىكتەرى بار.
«رەزەرۆكە بارۋعا ءار ادام ەرىكتى تۇردە تاڭداۋ جاسايدى. اسىرەسە، جۇمىسسىز جۇرگەندەردى اسكەرگە تارتۋ پىسىقتالدى. بۇل رەتتە ءتيىستى جالاقى تولەنەدى. ماسەلەن، اي سايىن بىرنەشە ساباققا قاتىسقاندارعا مينيمالدى جالاقى، ال وقۋ- جاتتىعۋ جيىندارى كەزىندە ورتاشا ايلىق جالاقى بەرىلەدى»، - دەدى ەرمۇرات سەيتقازى ۇلى.
توتەنشە نەمەسە سوعىس جاعدايىندا جالاقى ماسەلەسى ءتيىستى زاڭدار اياسىندا رەتتەلەتىن بولادى.
دەپۋتاتتىڭ سوزىنە قاراعاندا، بۇل زاڭ جوباسىن ازىرلەۋ كەزىندە الەمدەگى ءبىرقاتار قاقتىعىس ايماعىندا جيناقتالعان تاجىريبە زەرتتەلدى. زاڭ جوباسىن قورعانىس مينيسترلىگى دايارلاپ، بۇل ۆەدومستۆو ءبىراز دەرەكتى زەردەلەگەن.
«اتاپ ايتقاندا، وسى اپتادا ماجىلىستە قارالاتىن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە رەزەرۆتەگى قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى جىل سوڭىنا دەيىن قابىلدانۋى كەرەك. سەبەبى بۇل قۇجاتتىڭ تاجىريبە جۇزىندە ىسكە اسىرىلۋى كەلەر جىلدان باستاپ قولعا الىنادى. رەزەرۆتەگى العاشقى اسكەري قۇرامالار 2025 -جىلدان قۇرىلا باستايدى. جالپى، قازىرگى تەڭسەلىپ تۇرعان گەوساياسي جاعدايدى ەسكەرە وتىرىپ، ارقانى كەڭگە سالىپ جۇرۋگە بولمايدى. بۇل زاڭ قابىلدانعاننان كەيىن، قورعانىس مينيسترلىگى شۇعىل جۇمىستارعا كىرىسەدى»، - دەدى ەرمۇرات باپي.
مۇنىمەن قوسا، وسى قۇجات اياسىندا رەزەرۆتەگى قىزمەتكە جۇمىلدىرىلعانداردىڭ جاۋاپكەرشىلىگى مەن مىندەتى، ءتارتىبى جان- جاقتى بەلگىلەنەدى.
زاڭ قابىلدانعان جاعدايدا، قورعانىس سالاسىنا بولىنەتىن بيۋدجەت قاراجاتى ءبىرشاما ءوسۋى مۇمكىن.
اۆتور
ايدار وسپاناليەۆ
