ەلىمىزدە ەرتەڭنەن باستاپ قويان اۋلاۋعا تىيىم سالىنادى

سەبەبى وسى مەزگىلدە قوياندار كوجەكتەي باستايدى.

- ەلدە ەرتەڭنەن باستاپ قويان اۋلاۋعا تىيىم سالىنادى. ويتكەنى ۇزىنقۇلاقتىلاردىڭ قوسىلاتىن ماۋسىمى باستالدى. ەكولوگيا جانە تابيعي رەسۋرستار مينيسترلىگى 2024 -جىلدىڭ 15- اقپانىنان بۇگىنگە كۇنگە دەيىن 390 مىڭعا جۋىق قويان اۋلاۋعا رۇقسات بەرگەن. ماسەلەن ءبىر عانا قاراعاندى وبلىسىنىڭ اڭشىلارى 65 مىڭ قويان اتۋعا ليسەنزيا العان. ءبىراق ەلدە قانشا ۇزىنقۇلاقتى اۋلانعانى جايلى اقپار جوق. ال، اڭشى قويانعا قۇس نەمەسە تازى سالسا وندا رۇقساتتىڭ كەرەگى جوق. تەك قۇجاتى بولسا بولدى.

كەيىنگى جىلدارى اڭعا قارۋسىز شىعاتىنداردىڭ قاتارى ارتىپ كەلەدى. مەيرام قاسىموۆ - سولاردىڭ ءبىرى. «اڭ مەن اڭشىنىڭ مۇمكىندىگى تەڭ بولۋ كەرەك»، - دەيدى ساياتشى.

مەيرام قاسىموۆ، اڭشى:

- مەن ءوزىم اڭعا تازىمەن شىعامىن. مىلتىقپەن شىققاندى قۇپتامايمىن. اڭعا دا مۇمكىندىك بەرۋ كەرەك.

ەلدە قوياننىڭ 3 ءتۇرى كەزدەسەدى. ونى اۋلاۋ ۋاقىتى دا ءارتۇرلى. ماسەلەن قۇم قويانىن 1- قاراشا مەن 31 -جەلتوقسان ارالىعىندا اتۋعا بولادى. ال، اق قويان مەن ور قويان 1- قاراشادان 15-اقپانعا دەيىن اۋلانادى. ۇزىنقۇلاقتىلار تەز كوبەيەدى. اقپاننان قاراشاعا دەيىن ولار ءۇش اي سايىن كوجەكتەيدى. ءار تۋعاندا كەمىندە 6-7 كوجەك تابادى.

ولجابەك حولوۆ، جانۋارلار دۇنيەسى جانە اڭشىلىق شارۋاشىلىعى باسقارماسىنىڭ باس ساراپشىسى:

- بىرىنشىدەن، ازامات اتىس قارۋىن قولدانىپ، اڭ اۋلايتىن بولسا، 21 جاسقا تولعان بولۋى كەرەك. ال اڭشى جىرتقىش قۇستارمەن، اڭشى يتتەرمەن اۋلاناتىن بولسا، 14 جاستان اسقان بولۋى كەرەك. جاس ەرەكشەلىكتەرىمەن بىرگە اڭشىدا اڭشى كۋالىگى مەن اڭشىلىق شارۋىشىلىق سۋبەكتىلەرىمەن بەرىلگەن جولدامالارى بولۋى قاجەت. اڭ اۋلاۋعا رۇقساتتى ول اڭشىلىق سۋبەكتىلەرىمەن بەرىلەتىن بولادى.

ەگەر تىيىم سالىنعان ۋاقىتتان باستاپ قويان اۋلايتىن بولساڭىز، 5 ايلىق ەسەپتىك كورسەتكىش مولشەرىندە ايىپپۇل ارقالايسىز. ال، زاڭعا باعىنباي تاعى قايتالاساڭىز، ايىپپۇل مولشەرى ارتىپ، اۋلاۋ قۇرالدارى تاركىلەنەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى