ەلىمىزدە كەيىنگى 5 جىل ىشىندە حالىق سانى 8,8 پايىزعا ءوستى
14-قاراشادا قازاقستان رەسپۋبليكاسى حالقىنىڭ سانى 20 ميلليونعا جەتتى. ەلىمىزدە كەيىنگى 5 جىل ىشىندە حالىق سانى 8,8 پايىزعا ءوستى، ال ەلدەگى بالالاردىڭ سانى 6,6 ميلليوندى قۇرادى، دەپ حابارلايدى Kazinform.
قازاقستان رەسپۋبليكاسى دەنساۋلىق ساقتاۋ مينيسترلىگىنىڭ مالىمەتىنشە، وتكەن جىلى بوساندىرۋ قىزمەتىنىڭ ۇيلەسىمدى جۇمىسىنىڭ ارقاسىندا 410 مىڭ كىشكەنتاي قازاقستاندىق امان-ەسەن دۇنيەگە كەلگەن. 2023 -جىلدىڭ باسىنان باستاپ جاڭا تۋعان نارەستەلەردىڭ سانى 339650 عا جەتتى.
بۇگىندە ەلىمىزدە 250 بوساندىرۋ ۇيىمى جۇمىس ىستەيدى، ونىڭ ىشىندە 39 پەريناتالدىق ورتالىق بار. وندا انا بولۋ قاۋىپسىزدىگىنىڭ بارلىق قاعيداتتارى ەنگىزىلىپ، سالماعى 500 گرامنان اساتىن سابيلەردى كۇتۋ ءۇشىن تەراپيا مەن رەانيماتسيانىڭ زاماناۋي تەحنولوگيالارى قولدانىلادى.
ءسابي جاسىنداعى اۋرۋلاردى ەرتە انىقتاۋ جانە ۋاقتىلى تۇزەتۋ، ەمدەۋ ماقساتىندا سكرينينگتىك باعدارلامالاردى جەتىلدىرۋ بويىنشا جۇمىستار جۇرگىزىلىپ جاتىر. زات الماسۋدىڭ تۇقىم قۋالايتىن اۋرۋلارىن، سەنسورلىق بۇزىلۋلاردى دياگنوستيكالاۋدىڭ جاڭا ادىستەرى ەرتە ارالاسۋ، ءومىر ءسۇرۋ ساپاسىن جاقسارتۋ جانە الەۋمەتتىك ءمانى بار اۋرۋلاردىڭ جۇكتەمەسىن ازايتۋ ماقساتىندا ەنگىزىلۋدە. رەسپۋبليكا بويىنشا جۇكتى ايەلدەردى 1,2 ميلليونعا دەيىن پرەناتالدىق سكرينينگپەن قامتۋدى ەلەۋلى ارتتىراتىن 20 ۇرىقتى ساقتاۋ ورتالىعى اشىلدى. نەوناتالدىق سكرينينگپەن 400 مىڭنان استام جاڭا تۋعان نارەستە، پسيحوفيزيكالىق سكرينينگپەن - 3 جاسقا دەيىنگى 1,5 ميلليون بالا جانە 6 جاسقا دەيىنگى 2 ميلليون بالا اۋديولوگيالىق سكرينينگپەن قامتىلدى.
بيىلعى جىلى پەرزەنتحانادا 7,5 مىڭ شالا تۋعان نارەستەلەر ەرتە ارالاسۋ ءتاسىلىن قولدانۋ جانە سابيلەرگە دۇنيەنى كورۋگە كومەكتەسۋ ءۇشىن رەتينوپاتيا سكرينينگىنەن ءوتتى. بالالاردىڭ دەنساۋلىعىن نىعايتۋ ماقساتىندا جىل سايىن تۋعانىنان باستاپ 18 جاسقا دەيىنگى بالالارعا پروفيلاكتيكالىق تەكسەرۋلەر جۇرگىزىلەدى. بيىل 9 ايىندا 4,3 ميلليون بالا پروفيلاكتيكالىق تەكسەرۋدەن ءوتتى. نەوناتولوگياداعى جوعارى مامانداندىرىلعان كومەك دامىعان جاعدايدا دەنە سالماعى وتە تومەن بالالاردىڭ ءومىر ءسۇرۋ دەڭگەيى 4 ەسە ءوستى. سابيلەر ءولىمى 1,5 ەسە تومەندەدى جانە بۇگىنگى كۇنى بۇل كورسەتكىش تۇراقتى بولىپ قالۋدا.
مەملەكەت باسشىسىنىڭ تاپسىرماسىن ورىنداۋ شەڭبەرىندە قازاقستان رەسپۋبليكاسىندا انا مەن بالا دەنساۋلىعىن ساقتاۋ قىزمەتىن دامىتۋدىڭ 2024 - 2030 -جىلدارعا ارنالعان «ءاربىر ايەل - ءاربىر بالا» تۇجىرىمداماسىنىڭ جوباسى ازىرلەندى.
قازاقستانداعى بالالارعا مەديتسينالىق كومەك كەپىلدى كولەم شەڭبەرىندە دە، الەۋمەتتىك مەديتسينالىق ساقتاندىرۋ جۇيەسىندە دە تەگىن كورسەتىلەدى، ويتكەنى بالالار مەملەكەتتىڭ ەسەبىنەن ساقتاندىرىلعان. جىل سايىن امبۋلاتوريالىق دەڭگەيدە بالالاردىڭ 100 ميلليوننان استام كونسۋلتاتسيالىق- دياگنوستيكالىق قابىلداۋى تەگىن جۇرگىزىلەدى، تاۋلىك بويى ستاتسيونارلاردا 500 مىڭنان استام بالا كومەك الادى، العاشقى تۋعان كۇندەرىنەن باستاپ كۇردەلى جوعارى تەحنولوگيالىق ارالاسۋدى قوسا العاندا، 100 مىڭنان استام وپەراتسيا جۇزەگە اسىرىلادى.
ايتا كەتەيىك، بالالاردىڭ دەنساۋلىعىن ساقتاۋ سالاسىندا بۇگىندە 2640 پەدياتر، 773 نەوناتولوگ جۇمىس ىستەيدى.
اۆتور
ابىلايحان جۇماشيەۆ
