ەلىمىزدە جاڭادان سالىناتىن اۆتوجولدار بەلگىلى بولدى

- ترانزيتتىك الەۋەتتە اۆتوكولىككە جەكە توقتالعىم كەلەدى. ويتكەنى بۇل تاسىمال ءتۇرى جىلدان-جىلعا ەسەلەپ ءوسىپ جاتىر. 2023 -جىلى ترانزيت %40 عا، ال يمپورت/ەكسپورت %20 عا ۇلعايدى. سونىڭ ىشىندە قىتايمەن تاسىمالدىڭ ءوسۋ قارقىنى وتە جوعارى. بىلتىر يمپورت/ەكسپورت 2 جارىم ەسەگە، ال ترانزيت 2 ەسەگە ۇلعايىپ، تيىسىنشە 1,8 جانە 2,2 ميلليون توننانى قۇراسا، بيىل توعىز ايدىڭ وزىندە وسى كورسەتكىشتەر تاعى دا 59 جانە %67 عا ءوستى (1,9 ميلليون جانە 2,5 ميلليون توننا). كورشى ەلدەر دە وزدەرىنىڭ ترانزيت الەۋەتىن ارتتىرۋ ءۇشىن ءتيىستى ينفراقۇرىلىمدى دامىتۋ جۇمىستارىن اتقارىپ وتىر. سوندىقتان ءبىز ءوز ينفراقۇرىلىمىمىزدى دامىتا وتىرىپ، قازاقستان ارقىلى وتەتىن قوسىمشا 3 مارشرۋتتى العا جىلجىتىپ جاتىرمىز. ءبىرىنشى باعىت - «باتۋمي- ۆارنا- كونستانسا» ارقىلى سۋ جولى. ەكىنشىسى - باكۋ، گرۋزيا ارقىلى تۇركياعا شىعاتىن مۋلتيمودالدى جول. ال ءۇشىنشى باعىت - «تۇرىكمەنستان- يران- تۇركيا» ارقىلى ەۋروپاعا شىعاتىن قۇرلىق جولى، - دەدى م. قارابايەۆ.

ونىڭ ايتۋىنشا، كولىكتىڭ باسقا تۇرلەرىمەن سالىستىرعاندا ەڭ جوعارى تاسىمال ءوسىمىن اۆتوكولىك باعىتى بايقاتىپ وتىر. سوندىقتان باستى باعىتتاردىڭ ءبىرى - اۆتوموبيل ترانزيتىن ءارى قاراي دامىتۋ. ول ءۇشىن سالاداعى اكىمشىلىك شارالاردى ءتيىمدى رەتتەۋ جانە ينفراقۇرىلىمدى، ياعني اۆتوجولداردىڭ جاعدايىن جاقسارتۋ قاجەت.

- اكىمشىلىك سالالارعا توقتالاتىن بولساق، بيىل قىتاي جانە وزبەكستان ەلدەرىمەن تاسىمال ءۇشىن بەرىلەتىن شەتەلدىك رۇقسات بلانكىلەردى تولىقتاي ەلەكتروندى فورماتقا وتكىزدىك. ناتيجەسىندە، رەيستەر سانى وزبەكستانمەن 6 مىڭنان 36 مىڭعا، قىتايمەن 113 مىڭنان 230 مىڭعا دەيىن ءوستى. سونىمەن قاتار، شەتەلدىك بلانكىلەردى قولدانۋ ۇردىسىندەگى ادامي فاكتور تولىعىمەن الىنىپ، سىبايلاس جەمقورلىق تاۋەكەلدەرى تۇبەگەيلى جويىلدى، - دەدى مينيستر.

سونىمەن قاتار ول جول ينفراقۇرىلىمىنا توقتالا كەلە، مەملەكەت باسشىسىنىڭ تاپسىرماسى اياسىندا بيىل 12 مىڭ شاقىرىم جول قۇرىلىس جۇمىستارىمەن قامتىلعانىن ايتتى. ونىڭ 7 مىڭ شاقىرىمىندا قۇرىلىس جانە جوندەۋ جۇمىستارى تولىقتاي اياقتالدى. «قاراعاندى - الماتى»، «تالدىقورعان - وسكەمەن»، «اقتوبە - اتىراۋ - استراحان» سياقتى باستى ترانزيتتىك دالىزدەردە جاڭا اسفالت توسەمىمەن كولىك قوزعالىسى اشىلدى.

- قولدانىستاعى جولداردى دامىتۋ ءۇشىن 2030 -جىلعا دەيىن « قىزىلوردا - اقتوبە» جولىن 4 جولاقتىعا اۋىستىرۋ، سونداي-اق سارىاعاش قالاسىنىڭ ءبىرىنشى ساناتتاعى اينالما جولىن سالۋ جوسپارلانعان. مۇنىمەن قوسا، «قالباتاۋ - مايقاپشاعاي» اۆتوجولىن رەكونسترۋكسيالاۋ جۇمىستارى، قاراعاندىدان بوعاز اۋىلىنا دەيىنگى جول ۋچاسكەلەرىنىڭ ورتاشا جوندەۋى جۇرگىزىلىپ جاتىر. كەلەر جىلدان باستاپ «قاراعاندى - جەزقازعان» اۆتوجولىن رەكونسترۋكسيالاۋ جۇمىستارى باستالادى. بۇل شارالاردى اياقتاۋ ناتيجەسىندە، قازىرگى «باتىس ەۋروپا - باتىس قىتاي» دالىزىنە بالامالى جاڭا مارشرۋت قالىپتاسادى. كەلەسى ۇلكەن ماسەلە - بەينەۋ مەن سەكسەۋىلدىڭ اراسىن جالعايتىن جاڭا جول سالۋ. وسىعان بايلانىستى 2027 -جىلدان باستاپ 736 شاقىرىمدىق اۆتوجول قۇرىلىسى باستالادى. بۇل اقتاۋ مەن قۇرىق پورتتارىنا جانە تۇرىكمەنستانعا باراتىن جولداردى 900 شاقىرىمعا قىسقارتۋعا جانە وڭتۇستىك پەن باتىس وڭىرلەرىنىڭ بايلانىسىن ارتتىرۋعا مۇمكىندىك بەرەدى، - دەدى ۆەدومستۆو باسشىسى.

بۇدان بۇرىن حابارلانعانداي، مارات قارابايەۆ قۇرىق پورتىنىڭ جانىندا كەمە قۇراستىراتىن زاۋىت سالىناتىنىن ايتتى.

اۆتور

رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى