ەلىمىزدە شامادان تىس كرەديت الۋعا شەكتەۋ قويىلۋى مۇمكىن
ەلىمىزدە شامادان تىس كرەديت ماسەلەسى بويىنشا زاڭناما پىسىقتالىپ پارلامەنت قاراۋىندا جىبەرىلەدى. بۇل تۋرالى ۇكىمەت باسشىسى ءاليحان سمايىلوا ءمالىم ەتتى، دەپ حابارلايدى Kazinform.
«شامادان تىس كرەديت الۋ پروبلەمالارىن تۇبەگەيلى شەشۋ ءۇشىن بانكتەردە جانە كرەديت الۋشىلاردىڭ ساناتتارىنا قاراي شەكتەۋلەر ەنگىزۋ قاجەت. ميكروقارجىلىق ۇيىمداردىڭ، اسىرەسە «جالاقىعا دەيىن» قارىز بەرەتىن ۇيىمداردىڭ شەكتى كرەديتتەۋ مولشەرلەمەلەرىن، سومالارى مەن مەرزىمدەرىن قايتا قاراۋ قاجەت. ۇسىنىلىپ وتىرعان بارلىق زاڭنامالىق تۇزەتۋلەر پىسىقتالىپ، جىل سوڭىنا دەيىن پارلامەنتكە ەنگىزىلۋى ءتيىس»، - دەدى ءاليحان سمايىلوۆ ۇكىمەت وتىرىسىندا.
پرەمەر-ءمينيستردىڭ ايتۋىنشا، اتالعان شارالار ازاماتتاردىڭ شامادان تىس قارىز الۋىن شەكتەۋگە جانە تۇتىنۋ كرەديتتەرىن بەرۋدە تاۋەكەلدەردى ازايتۋعا ىقپال ەتەدى.
«حالىقتىڭ قارجىلىق ساۋاتتىلىعىن ارتتىرۋ ءۇشىن وقۋ-اعارتۋ مينيسترلىگى وقۋ باعدارلامالارى شەڭبەرىندە قارجىلىق ساۋاتتىلىق كۋرستارىن ەنگىزۋ ماسەلەسىن پىسىقتاۋى كەرەك. عىلىم مينيسترلىگى بۇل ماسەلەلەردى جوعارى وقۋ ورىندارىمەن بىرگە قاراۋى ءتيىس. كامەلەتكە تولعان جاستار وزدەرىنىڭ قارجىلىق مۇمكىندىكتەرىن قالاي دۇرىس ەسەپتەۋ كەرەكتىگىن، كرەديتتى قالاي جانە قانداي كرەديت الۋ كەرەكتىگىن ناقتى ءتۇسىنۋى كەرەك. مۇنداي تاجىريبە كوپتەگەن ەلدەردە بار»، - دەيدى ول.
