ەلىمىزدە ادۆوكاتتىق مانتيا بەكىتىلدى

رەسپۋبليكالىق ادۆوكاتتار القاسىنىڭ ءتورالقاسى ادۆوكاتتىق مانتيا مەن ونىڭ سيپاتتاماسىن بەكىتتى. بۇل قۇقىق «ادۆوكاتتىق قىزمەت جانە زاڭ كومەگى تۋرالى» قازاقستان رەسپۋبليكاسى زاڭىنىڭ 33-بابىنىڭ 6-تارماعىندا كوزدەلگەن.

مانتيا - ادۆوكاتتىڭ باسقا جەكە سۋبەكتىلەردەن ەرەكشەلەنەتىن ەرەكشە قوعامدىق- قۇقىقتىق مارتەبە بەلگىسى. ادۆوكات كاسىبي قىزمەتىن جۇزەگە اسىرۋعا كەدەرگى كەلتىرەتىن قۋدالاۋدان، تىنتۋدەن جانە باسقا دا ارالاسۋلاردان قورعايتىن ەرەكشە كاسىبي ارتىقشىلىققا يە.

- مانتيا كيۋ - مىندەت ەمەس، قۇقىق. ءاربىر ادۆوكات سوت وتىرىستارىندا مانتيا كيۋدىڭ قاجەتتىلىگىن ءوزى شەشۋگە قۇقىلى. سونىمەن قاتار، مانتيانى كاسىبي مارتەبەگە ساي سالتاناتتى ءىس- شارالاردا دا كيۋى مۇمكىن. مانتيانىڭ فورماسى كەڭ تالقىلاۋ ناتيجەلەرى بويىنشا تاڭدالادى. 2024 -جىلى ادۆوكاتتاردىڭ III رەسپۋبليكالىق سپارتاكياداسى اياسىندا ادۆوكاتتىق مانتيا جوبالارىنىڭ العاشقى تۇساۋكەسەرى ءوتتى. سونداي- اق، انونيمدى ساۋالناما جۇرگىزىلدى، وعان ۇسىنىلعان مودەلدەر تۋرالى ءوز پىكىرلەرىن بىلدىرگەن 300 گە جۋىق ادۆوكات قاتىستى، - دەلىنگەن رەسپۋبليكالىق ادۆوكاتتار القاسىنىڭ باسپا ءسوز قىزمەتى تاراتقان حابارلامادا.

الدىن الا تالقىلاۋ قورىتىندىسى بويىنشا ادۆوكاتتار ءتورالقاسى بۇكىل ادۆوكات قاۋىمداستىعى اراسىندا كەڭىرەك جانە اشىق ساۋالناما جۇرگىزۋ تۋرالى شەشىم قابىلدادى.

- وعان ەلىمىزدىڭ بارلىق وڭىرىنەن 3 مىڭنان استام ادۆوكات قاتىستى. داۋىس بەرۋگە ءۇش قازاقستاندىق ديزاينەردىڭ مانتيا ۇلگىلەرى شىعارىلدى. ساۋالناما ناتيجەلەرى بويىنشا، سونداي- اق اۋماقتىق القالار ۇسىنعان ۇستانىمداردى ەسكەرە وتىرىپ، ءتورالقا مانتيا مودەلىن بەكىتتى، - دەدى رەسپۋبليكالىق ادۆوكاتتار القاسىنىڭ ءتوراعاسى ايدىن بيكەبايەۆ.

مانتيانىڭ نەگىزگى ەلەمەنتتەرى:

● قارا ماتا، اسپان- كوگىلدىر ءتۇستى جاعاسى بار، بۇل ءتۇس قازاقستان تۋىنىڭ ءتۇسىن بەينەلەيدى؛
● مانتيانىڭ جاعاسى مەن ساندىك لەنتالارىندا «قورعاۋ» ۇلتتىق ورنەگى قولدانىلعان، بۇل «قورعاۋ» نەمەسە «تۇمار» دەگەندى بىلدىرەدى (سيمۆول مەملەكەتتىك كەڭەسشى ەرلان كارين قۇراستىرعان «OIU Qazaq Design» جيناعىنان الىندى)؛
● مانتيانىڭ اشىق فاسونى - تۇيمەسىز جانە بەكىتكىشسىز - ادۆوكاتتىڭ ەركىندىگى مەن تاۋەلسىزدىگىن بەينەلەيدى.
● ورنەكتەرى بار سيممەتريالى كوك لەنتالار تەڭدىكتى، تەپە-تەڭدىكتى جانە ادىلەتتىلىكتى بىلدىرەدى.

ءار ادۆوكات مانتيانى كەز كەلگەن تىگىن شەبەرحاناسىندا تىگۋگە قۇقىلى. جاساۋ پروتسەسى ەرەجەدە كورسەتىلگەن سيپاتتاماعا سايكەس جۇزەگە اسىرىلادى.

ادۆوكاتتىق مانتيانى كيۋ ءتارتىبى مەن سيپاتتاماسى تۋرالى بەكىتىلگەن ەرەجەمەن رەسپۋبليكالىق ادۆوكاتتار القاسىنىڭ سايتىندا advokatura.kz تانىسۋعا بولادى.

ەسكە سالايىق، جىل باسىندا ەلىمىزدە ادۆوكاتتاردىڭ قىزمەتى قانشا تۇراتىنى تۋرالى شولۋ جاساعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى