ەلىمىزدە 259 بوسقىن بار، 473 شەتەلدىك پانا ىزدەپ ءجۇر - كوشى-قون كوميتەتى
استانا. KAZINFORM - بيىل 1- قاڭتارداعى جاعداي بويىنشا 473 شەتەل ازاماتى «بوسقىن» ستاتۋسىن الدى.
بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى كوشى-قون كوميتەتىنىڭ ءتوراعاسى اسقاربەك ەرتايەۆ ءمالىم ەتتى.
«ىنتىماقتاستىقتى دامىتۋ جانە نىعايتۋ ماقساتىندا ءبىزدىڭ مينيسترلىك پەن ب ۇ ۇ بوسقىندار ءىسى جونىندەگى جوعارعى كوميسسارىنىڭ باسقارماسى اراسىندا ءوزارا تۇسىنىستىك تۋرالى مەموراندۋم جاسالدى. ونىڭ اياسىندا بوسقىندار مارتەبەسى تۋرالى كونۆەنتسيانىڭ نورمالارىمەن ۇلتتىق زاڭناما نورمالارىن يمپلەمەنتاتسيالاۋ بويىنشا جۇمىس جۇرگىزىلىپ جاتىر»، - دەدى اسقاربەك ەرتايەۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
سپيكەردىڭ مالىمدەۋىنشە، بوسقىندارعا مەديتسينالىق جانە الەۋمەتتىك كومەك بەرۋ بويىنشا ۇسىنىستار ازىرلەندى.
«2024-جىلعى 1- قاڭتارداعى جاعداي بويىنشا ەلدە 473 پانا ىزدەۋشى مەن 259 بوسقىن تۇرادى. پانا ىزدەپ جۇرگەن ادامداردىڭ جاپپاي كەلۋى جاعدايىندا ۋاقىتشا قونىستانۋ پۋنكتتەرىن جانە ولاردى قابىلداۋ ءتارتىبىن ايقىنداۋ جونىندەگى ءتيىستى ەرەجەلەر بەكىتىلدى»، - دەيدى كوميتەت ءتوراعاسى.
