ەلىمىزدە 208 پەداگوگ مەكتەپ ديرەكتورلىعىنا كونكۋرسسىز وتەدى
استانا. KAZINFORM - بۇگىن ەلوردادا مەملەكەت باسشىسىنىڭ تاپسىرماسىنا سايكەس، جاستار كادرلىق رەزەرۆى ۇلگىسىندەگى «ءبىلىم بەرۋدەگى وزگەرىستىڭ 1000 كوشباسشىسى» جوباسىن ءساتتى اياقتاعان پەداگوگتەرگە وقۋ-اعارتۋ ءمينيسترى عاني بەيسەمبايەۆ سەرتيفيكات تابىستادى.
بۇل ىرىكتەۋ مەن بىلىكتىلىك كۋرسىنان وتكەندەرگە ەشبىر كونكۋرستىق ءراسىمسىز بىردەن ءبىرىنشى باسشىنىڭ بوس ورنىنا تاعايىندالۋعا مۇمكىندىك بەرەدى.
- بۇل - وتاندىق ءبىلىم جۇيەسىن دامىتۋدىڭ جاڭا كەزەڭى. سەگىز ايدىڭ ىشىندە سىزدەر ىرىكتەۋدەن ءوتىپ، جەكە، كاسىبي، باسقارۋشىلىق، اناليتيكالىق داعدىلار مەن قۇزىرەتتەرىڭىزدى دامىتتىڭىزدار. ەندى سىزدەر ناعىز كوشباسشىلار رەتىندە ەلىمىزدەگى ءبىلىم بەرۋ جۇيەسىنىڭ ساپاسىن ارتتىرۋعا ءوز ۇلەستەرىڭىزدى قوسۋلارىڭىز كەرەك. ەڭ باستىسى - بالالارىمىز بەن پەداگوگتەرىمىزگە جايلى جانە ءقاۋىپسىز ورتا قالىپتاستىرۋ، - دەدى مينيستر.
ايتا كەتەيىك، وقۋ-اعارتۋ مينيسترلىگىنىڭ تاپسىرماسىن ىسكە اسىرۋ، ۇمىتكەرلەردى ىرىكتەۋ مەن ولاردىڭ بىلىكتىلىگىن ارتتىرۋ شارالارىن نازاربايەۆ زياتكەرلىك مەكتەپتەرى دەربەس ءبىلىم بەرۋ ۇيىمىنىڭ پەداگوگيكالىق شەبەرلىك ورتالىعى وتكىزگەن.
ورتالىق كوشباسشىلاردى بەس كەزەڭ بويىنشا ىرىكتەگەن.
العاشقى كەزەڭدە ۇمىتكەرلەر ءوز قۇزىرەتتىلىگىن باعالاۋ ءۇشىن تەستىلەۋدەن وتسە، ەكىنشى كەزەڭدە وقۋعا جىبەرىلەدى.
مۇنان سوڭ ەلىمىزدىڭ الدىڭعى قاتارلى مەكتەپتەرىندە تاعىلىمدامادان وتەدى، ءتورتىنشى كەزەڭدە قورىتىندى باعالاۋ ءراسىمى جۇرگىزىلىپ، بەسىنشى كەزەڭدە مينيسترلىك جانىنداعى كوميسسيامەن اڭگىمەلەسۋدەن وتەدى.
بۇل مەكتەپ باسشىلارىنىڭ رەسپۋبليكالىق كادرلىق رەزەرۆىن قۇرۋ ءۇشىن جاسالىپ وتىر.
- باعدارلاما حالىقارالىق وزىق تاجىريبەلەردى ەسكەرە وتىرىپ ىسكە اسىرىلدى، ال تەستىلەۋ شارالارى جەتەكشى تاجىريبەلەرگە نەگىزدەلگەن. باستاپقى كەزەڭدە جوباعا قاتىسۋعا 8068 ادام تىركەلىپ، ونىڭ 2809 ى تەستىلەۋدەن ءوتتى. تەستىلەۋ ناتيجەلەرى بويىنشا وقۋعا ۇسىنىلعان ۇمىتكەرلەردىڭ سارالانعان ءتىزىمى قالىپتاستىرىلدى. پەداگوگيكالىق شەبەرلىك ورتالىعى بىلتىرعى شىلدەدەن باستاپ بازالىق دەڭگەيدە 500 گە تارتا ۇمىتكەردى وقىتتى. الايدا بارلىق كەزەڭنەن سۇرىنبەي وتكەن 208 پەداگوگ قانا جوبا سەرتيفيكاتىنا يە بولىپ، رەزەرۆكە ەندى، - دەدى «نازاربايەۆ زياتكەرلىك مەكتەپتەرى» د ب ب ۇ باسقارما ءتوراعاسى ءانۋار جانعوزين.
سونداي-اق توپ-مەنەدجەرلەر زاماناۋي مەكتەپتەگى تەندەنتسيالار، مۇعالىمنىڭ ۇزدىكسىز دامۋى مەن كاسىبي ءال-اۋقاتى، بالاعا قولايلى ورتا قۇرۋ، ستراتەگيالىق جوسپارلاۋ، تابىستى ديرەكتور رەتىندەگى بەدەل، كاسىبي ەكولوگيا، اناليتيكالىق قۇزىرەتتەر سىندى تاقىرىپتاردى تەرەڭىرەك زەرتتەدى.
«نازاربايەۆ زياتكەرلىك مەكتەپتەرى» د ب ب ۇ كۋرستان كەيىن دە قاتىسۋشىلاردى سۇيەمەلدەۋ، بولاشاق باسشىلاردىڭ كاسىبي دامۋىنىڭ جۇيەلى مونيتورينگىن جاسايدى.
ەلىمىزدەگى مەكتەپتەردىڭ ءبىلىم ساپاسىن ارتتىرىپ، دەڭگەيىن كوتەرۋگە باعىتتالعان جوبا بيىل دا جالعاسىن تابادى.
