ەلىمىزدە 11 كۇندە تۇرمىستىق جانجال تۋرالى 4 مىڭنان استام حابارلاما تىركەلدى
استانا. KAZINFORM - بۇل تۋرالى ءى ءى م اكىمشىلىك پوليتسيا كوميتەتىنىڭ اعا ينسپەكتورى اقمارال سەرىكبايەۆا ايتتى.
«وسى جىلدىڭ 15-26- قاڭتارى ارالىعىندا ەل اۋماعىندا «تۇرمىس» الدىن الۋ ءىس-شاراسى وتكىزىلدى. ونىڭ قورىتىندىسىنا ساي پوليتسيادا وتباسىلىق، تۇرمىستىق جانجال تۋرالى 4 مىڭنان استام حابارلاما تىركەلدى. سونىڭ 1,5 مىڭىن پوليتسيا قىزمەتكەرلەرى وزدەرى ۇيلەردى ارالاۋ بارىسىندا انىقتادى. ءىس جۇزىندە «اگرەسسورلاردىڭ» بارلىعى نەمەسە 95 پايىزى اكىمشىلىك جاۋاپكەرشىلىككە تارتىلدى»، - دەدى ول ءى ءى م باسپا ءسوز قىزمەتى الاڭىندا وتكەن بريفينگىدە.
ءى ءى م وكىلى وتباسىلىق جانجالدىڭ نەگىزگى سەبەبى ماسكۇنەمدىك، لۋدومانيا، ادامگەرشىلىك قۇندىلىقتاردىڭ تومەندەۋى جانە سونىڭ سالدارىنان وتباسى ينستيتۋتىنىڭ جوعالۋى ەكەنىن ايتادى.
«وسىنداي زورلىق-زومبىلىقتىڭ سەبەپتەرىن ۋاقتىلى انىقتاۋ جانە جويۋ ءۇشىن الدىن الۋ ءىس-شارالارى قولعا الىندى. تۇرمىستىق زورلىق-زومبىلىق جاساعانى ءۇشىن بۇرىن پوليتسيانىڭ نازارىنا تۇسكەن 39 مىڭعا جۋىق اداممەن پروفيلاكتيكالىق اڭگىمە جۇرگىزىلدى.
قاۋىپتىلىك دەڭگەيىن انىقتاۋ ءۇشىن 3669 وتباسىدان ساۋالناما الىندى. ساۋالناما ناتيجەسىندە 559 وتباسىندا قايتا قۇقىق بۇزۋشىلىق جاساۋ قاۋپى جوعارى ەكەنى انىقتالدى. سونداي-اق قۇقىق بۇزۋشىلارعا اگرەسسيانى بولدىرماۋ ءۇشىن پسيحوكوررەكتسيالىق كۋرستاردان ءوز ەركىمەن ءوتۋ ۇسىنىلدى. ومىرلىك قيىن جاعدايداعى 675 وتباسى، ونىڭ ىشىندە قولايسىز الەۋمەتتىك ورتاداعى زورلىق-زومبىلىق بەلگىلەرى بار بالالارى انىقتالدى. ولار تۋرالى كومەك كورسەتۋ ءۇشىن مۇددەلى مەملەكەتتىك ورگاندارعا اقپارات جىبەرىلدى»، - دەدى اقمارال سەرىكبايەۆا.
