«ەلىم دەپ كۇي توگەمىن» - ەلوردادا نۇرلان بەكەنوۆتىڭ شىعارماشىلىق كەشى وتەدى
3-قاراشا كۇنى ساعات 19:00-دە استاناداعى ە. راحماديەۆ اتىنداعى مەملەكەتتىك اكادەميالىق فيلارمونيانىڭ كونسەرت زالىندا كۇيشى، كومپوزيتور، ديريجەر، مادەنيەت قايراتكەرى نۇرلان بەكەنوۆتىڭ «ەلىم دەپ كۇي توگەمىن» اتتى شىعارماشىلىق كەشى وتەدى، دەپ حابارلايدى Kazinform.
«بيىل استانا قالاسىنىڭ 25 جىلدىعى اتالىپ ءوتتى. مەنىڭ دە ەلورداعا كەلىپ، سول كەزدەگى مۋزىكا اكادەمياسىنا ءتۇسىپ، ونەر جولىمدى باستاعانىما 25 جىل تولدى. سوعان وراي حالقىمىزدىڭ رۋحاني بايلىعى - كۇي ونەرىن قۇرمەتتەپ، تەبىرەنە تىڭدايتىن جۇرتشىلىققا جاڭا تۋىندىلارىمدى تارتۋ ەتكەلى تۇرمىن»، - دەيدى نۇرلان بەكەنوۆ.
كونسەرتتىڭ جاڭالىقتارى وتە مول بولماق. جەتىسۋدان شىققان اتاقتى اعا سۇلتان تەزەك تورەنىڭ «ابىلايدىڭ اق يىعى» اتتى كۇيى العاش رەت ورىندالادى.
نۇرلان بەكەنوۆتىڭ «تاۋباي تولعاۋى نەمەسە اقىن ارمانى» اتتى كۇيىن قازاق وركەسترى ورىندايدى. بۇل كۇي اتىراۋ وڭىرىندە قۇرىلىس سالاسىندا ەڭبەك ەتىپ جۇرسە دە، ءومىرىن ونەرمەن بايلانىستىرىپ، اقىن رەتىندە اتى شىققان تاۋباي ساقتاعان ۇلىنا ارنالعان. سونداي-اق وسى كەشتە ت. ساقتاعان ۇلىنىڭ سوزىنە جازىلعان ن. بەكەنوۆتىڭ «جاستىق شاق قايتىپ كەلمەيدى» ءانىن سۆەتلانا ايتبايەۆا العاش رەت كورەرمەن نازارىنا ۇسىنادى.
نۇرلان بەكەنوۆتىڭ قابليسا جىراۋعا، وراقتى باتىرعا جانە شىڭعىس حاننىڭ وڭ قولى بولعان مۇقالي باتىرعا ارنالعان كۇي داستاندارى ورىندالادى.
ن. بەكەنوۆتىڭ «التى الاشتىڭ بالاسى» اتتى جاڭا ءانىن «بالداۋرەن» بالالار حورى شىرقايدى. ءسوزىن جازعان ايباتىر سەيتاق. بۇدان باسقا دا كوپتەگەن تۋىندىلار بار.
ونەر ۇجىمىن ساحناعا اتالعان قازاق وركەسترىنىڭ كوركەمدىك جەتەكشىسى جانە باس ديريجەرى، قازاقستاننىڭ ەڭبەك سىڭىرگەن قايراتكەرى، پروفەسسور ايتقالي جايىموۆ باستاپ شىعادى.
كومپوزيتوردىڭ شىعارماشىلىق كەشىندە حالىق ءارتىسى التىنبەك قورازبايەۆ، كۇيشى سەكەن تۇرىسبەك، قازاقستاننىڭ ەڭبەك سىڭىرگەن قايراتكەرى سەرىك ەركىمبەكوۆ، تاتتىمبەت اتىنداعى اكادەميالىق قازاق حالىق اسپاپتارى وركەسترىنىڭ باس ديريجەرى ەرلان باقتىگەرەي، انشىلەر زاعيپا يمانعازيەۆا مەن گۇلميرا سارينا، «گۇلمارجان» دۋەتى جانە باسقا دا دارىن يەلەرى ونەر كورسەتەدى دەپ كۇتىلۋدە.
اۆتور
ەربول جانات
