ۇلى بريتانيالىق ەرلى-زايىپتى يراندا تىڭشىلىق جاسادى دەگەن ايىپپەن قاماۋعا الىندى
استانا. KAZINFORM - قاڭتار ايىندا يراننىڭ كەرمان پروۆينتسياسىندا تۇتقىندالعان بريتان ازاماتتارى كرەيگ پەن ليندسي فورمانعا تىڭشىلىق جاسادى دەگەن ايىپ تاعىلىپ وتىر. بۇل تۋرالى BBC حابارلادى.
مالىمەتتەرگە سايكەس، ەرلى-زايىپتىلار موتوتسيكلمەن الەمدى ارالاپ ساياحاتتاپ ءجۇرىپ، 30-جەلتوقساندا ارمەنيادان يرانعا وتكەن. ولار يران ۇكىمەتى تاراپىنان تىڭشىلىق جاسادى دەپ ايىپتالعانعا دەيىن ەلدە بەس كۇن قالۋدى جوسپارلاعان. فورماندار قاڭتار ايىندا يراننىڭ كەرمان قالاسىندا قاماۋعا الىنعان، ءبىراق وتكەن اپتادا عانا قاماۋعا الىنعانى تۋرالى حابار تارادى.
ەلدىڭ سوت جۇيەسىنىڭ وكىلى اسگار دجاحانگيردىڭ ايتۋىنشا، ەرلى- زايىپتىلار «بىرگە ساياحاتتاپ جۇرگەن 52 جاستاعى ەرلى- زايىپتىلار» دەگەن جەلەۋمەن يرانعا كىرىپ، ەلدىڭ كوپتەگەن پروۆينتسياسىندا اقپارات جيناعان.
قاماۋعا الىنار الدىندا دوكتورلىق دارەجەسى بار پسيحولوگ ليندسي فورمان الەۋمەتتىك جەلىدە جاڭا ءومىر باستاۋ ءۇشىن ۇلى بريتانيادان كەتىپ جاتقانىن جازعان.
- بۇل ادامدار زەرتتەۋ جانە ساياحاتتاۋ سىلتاۋىمەن باتىستىڭ بارلاۋ قىزمەتتەرىنە قاتىسى بار ۇيىمدارمەن بايلانىستا بولعان. ولاردى بارلاۋ اگەنتتىكتەرى قاداعالاپ، كەيىنىرەك جوسپارلانعان وپەراتسيانىڭ ءبىر بولىگى رەتىندە تۇتقىنعا الدى، - دەيدى اسگار دجاحانگير.
كەرمان وبلىسىنىڭ باس قازىسى حودجات- ۋل- يسلام ءال- مۋسليمين حاميديدىڭ ايتۋىنشا، ەرلى-زايىپتىنىڭ بارلاۋ قىزمەتتەرىنە قاتىستى بىرنەشە مەكەمەمەن بايلانىسى راستالعان جانە قوسىمشا تەرگەۋلەر جالعاسىپ جاتىر.
