ۇلى بريتانيادا قازاق-اعىلشىن سوزدىگى تانىستىرىلدى
ۇلى بريتانيا. KAZINFORM - وكسفوردا قازاق- اعىلشىن سوزدىگىنىڭ تۇساۋى كەسىلدى. وسىلايشا انا ءتىلىمىز الەمدەگى ەڭ تانىمال سوزدىك جەلىسىنە ەنىپ، عالامدىق لينگۆيستيكالىق ورتاعا قوسىلىپ وتىر، دەپ حابارلايدى Kazinform-نىڭ ۇلى بريتانياداعى مەنشىكتى ءتىلشىسى عالىمجان قارامان ۇلى.
الەمگە ايگىلى وكسفورد ۋنيۆەرسيتەتىنىڭ باسپاسى ءوز سوزدىكتەرىن 150 جىلدان بەرى شىعارىپ كەلەدى. سودان بەرى باسپا ءۇيى ءىرى- ءىرى تىلدەردى بىرىكتىرەتىن الىپ پلاتفورماعا اينالدى. قازاقستاندىق تاراپ العاش رەت بۇل باستامانى وسىدان 4 جىل بۇرىن قولعا العان.
«ۇلتتىق اۋدارما بيۋروسىمەن بىرلەسە تىعىز جۇمىس ىستەپ، تۇڭعىش قازاق سوزدىگىن باسىپ شىعاردىق. وسى جوبانىڭ ءبىر بولىگى بولعانىمىزعا وتە قۋانىشتىمىز. ءبىزدىڭ ميسسيامىز تىلگە قاتىستى دەرەكتەردى ءوندىرۋ جانە تاراتۋ. ارىپتەستىگىمىزدىڭ ارقاسىندا دەگەنىمىزگە جەتتىك دەپ ويلايمىن»، دەيدى وكسفورد ۋنيۆەرسيتەتى باسپاسىنىڭ وكىلى ساسكيە بريۋسكە.
«جالپى العاندا ەكى جاقتان 50 شاقتى مامان جۇمىس ىستەدى. بيىل تانىستىرىپ جاتىرمىز. بۇل سوزدىك ق ر پرەزيدەنتى قاسىم-جومارت كەمەل ۇلىنىڭ تاپسىرماسىمەن جاسالىپ وتىر. 10 مىڭ دانامەن تارالىپ ەلىمىزدىڭ بارلىق وقۋ ورىندارىنا جەتىپ جاتىر»، دەيدى «قازاق ءتىلى» قوعامىنىڭ پرەزيدەنتى راۋان كەنجەحان ۇلى.
ادىستەمە، تەحنولوگيا، ءسوزدىڭ رەەسترى وكسفورد سوزدىكتەرىنىڭ تالاپتارىنا ساي جاسالدى. اعىلشىن تىلىندەگى لەكسيكاسى مەن مەتوديكاسىنا وكسفورد ۋنيۆەرسيتەتىنىڭ باسپا ءىسى ارالاسسا، قازاق تىلىندەگى بولىگىنە احمەت بايتۇرسىن ۇلى اتىنداعى ءتىل ءبىلىمى ينستيتۋتى ۇلەس قوسقان. تۇساۋكەسەرگە جەرگىلىكتى اكادەميالىق ورتا، ستۋدەنتتەر قاۋىمى جانە قازاقستاندىق وكىلدەر قاتىستى.
«وتە ۇلكەن ابىروي ءبىز ءۇشىن. ەندى تسيفرلىق نۇسقاسىن، ەلەكتروندىق نۇسقاسىن دايارلاۋعا ءبىزدىڭ مينيسترلىك كومەكتەسەدى، بىردەن كىرىسەدى. ءبىزدىڭ ءتىل ساياساتى كوميتەتىنىڭ ناقتى تاپسىرماسى، ناقتى باعىتى بار»، دەيدى ق ر عىلىم جانە جوعارى ءبىلىم ءمينيسترى ساياسات نۇربەك.
«وكسفورد دەگەن كەزدە ويعا ءبىرىنشى نە كەلەدى دەپ 10 ادامنان سۇراساڭىز ولاردىڭ 9 ى سوزدىك دەپ ايتار ەدى. سوندىقتان دا وكسفورد قازاق- اعىلشىن سوزدىگىنىڭ الەمگە جول تارتۋى وتە ماڭىزدى. قازاق ءتىلىنىڭ حالىقارالىق ستاتۋسىن مويىنداتۋداعى، تاۋەلسىزدىگىمىز بەن ۇلتتىق بىرەگەيلىگىمىزدى تانىتۋداعى كەرەك قادام»، دەيدى قازاقستاننىڭ ۇلى بريتانياداعى ەلشىسى ماعجان ءىلياسوۆ.
قازاق ءتىلى عىلىم جانە تەحنولوگيا تىلىنە اينالۋى كەرەك. سوزدىكتىڭ وسى باعىتتا بەرەرى مول. تەرمينولوگيامەن اينالىساتىن مامانداردىڭ جۇمىسى جەتىلدىرىلىپ، ۇلتتىق لينگۆيستيكالىق كورپۋس پىسىقتالادى. ءبىلىم مەن عىلىمدى دامىتىپ، الەمگە پاش ەتەتىن ءتۇرلى جوبالار دۇنيەگە كەلەدى دەگەن زور ءۇمىت بار.
اۆتور
عالىمجان قارامان ۇلى
