ۇلى بريتانيادا قارىزعا بەلشەدەن باتقاندار كوبەيدى
ۇلى بريتانيادا وتكەن جىلى 4 ميلليونعا جۋىق ادام كەدەيشىلىكتىڭ قامىتىن كيگەن. ولاردىڭ 1 ميلليونعا جۋىعى - بالا. بيىل دا بۇل جاعداي جالعاسىپ جاتىر. 16 ميلليوننان استام تۇرعىن كومۋنالدىق تولەمدى كەشىكتىرىپ، نەسيە مەن تۇرعىن ءۇي سالىعىن تولەي الماي قينالۋدا. ولاردىڭ 2 ميلليونى مۇنداي جاعدايعا ءبىرىنشى رەت تاپ بولعان، دەپ حابارلايدى Kazinform.
لوندون تۇرعىنى كەرري باندا - قارىزدان قۇتىلۋدىڭ جولىن ىزدەپ جۇرگەندەردىڭ ءبىرى. 20000 فۋنت بەرەشەگى بار جانە ول سوما كۇن ساناپ ءوسىپ كەلەدى.
«ءبولىپ تولەسەم دە بىتەتىن ءتۇرى جوق» دەپ ناليدى. كەرري اپتاسىنا ەكى كۇن دارىگەردىڭ كومەكشىسى بولىپ جۇمىس ىستەيدى. جالاقىسىنا قوسا جاردەماقى السا دا، ءىشىپ-جەمىنە جەتكىزە المايدى. ول بۇگىن ازىق-تۇلىكپەن تەگىن قامتاماسىز ەتەتىن قايىرىمدىلىق ۇيىمىنا تاعى دا قول جايىپ كەلدى.
«مەن جالقاۋ ەمەسپىن. وتە كوپ جۇمىس ىستەيمىن. ءبىراق الەۋمەتتىك جاعدايىم قيىن»، - دەيدى كەرري باندا.
ستاتيستيكاعا سايكەس، كەدەيشىلىك قامىتىن كيگەندەردىڭ اراسىندا جەرگىلىكتى بيۋدجەتكە بەرەشەگى بارلار كوپ. ولار جاردەماقىلارىنىڭ تەڭ جارتىسىن تۇرعىن ءۇي سالىعى ءۇشىن تولەۋگە ءماجبۇر. بۇعان كوممۋنالدىق اقى مەن نەسيەنى قوسىڭىز. اسىرەسە، بالالى وتباسىلارعا قيىن.
«جارتى كۇن ىستەپ، ەدەن جۋۋشى بولىپ تاپقان تابىسىمدى گاز بەن جارىققا ارەڭ جەتكىزىپ ءجۇرمىن. كۇن سالقىنداعان سوڭ گازعا ءۇش ەسە كوپ اقى تولەيمىز. وتكەن جىلى پاتەردىڭ تەمپەراتۋراسى مينۋس ەكى بولىپ، قىمتانىپ جاتۋىمىزعا تۋرا كەلدى. ويتكەنى بەرەشەگىم بولعان سوڭ گاز ءسونىپ قالدى»، - دەيدى جالعىزباستى انا جاسمين گەنري.
ءومىر ءسۇرۋ قۇنىنىڭ قىمباتتاۋى مەن بانكتەگى پايىزدىق مولشەرلەمەنىڭ ءوسۋى حالىقتىڭ موينىنا قارىز قارعىباۋىن تاقتى. ۇلىبريتانيالىقتار تۇتىنۋشىلىق نەسيە مەن يپوتەكا بويىنشا بۇرىنعىدان كوپ تولەۋگە ءماجبۇر. بۇدان بولەك پاتەر جالداۋ اقىسى 12 پايىزعا قىمباتتاپ وتىر. بۇل سوڭعى توعىز جىلداعى ەڭ جوعارعى ءوسىم. بيلىكتەگىلەر بولسا، كەدەيشىلىكپەن كۇرەس قارقىندى ءجۇرىپ جاتىر دەۋدەن ءارى اسا الماي وتىر.
«2010 -جىلدان بەرى كەدەيشىلىكتىڭ قامىتىن كيگەندەردىڭ سانى 1,7 ميلليون ادامعا ازايدى. ولاردىڭ 400 مىڭى بالا. ءبىراق ءبىز قول قۋسىرىپ قاراپ وتىرعان جوقپىز. مينيسترلىك كۇنكورىس مينيمۋمىن جابۋ ءۇشىن 800 دەي تابىسى تومەن وتباسىعا ميلليونداپ جاردەماقى تولەدى. مۇمكىندىگى شەكتەۋلى 6 ميلليون ادامعا دا قول ۇشىن سوزدىق. ءساۋىر ايىندا كۇنكورىس مينيمۋمى 9,7 پايىزعا ءوستى»، - دەيدى ۇلى بريتانيانىڭ ەڭبەك جانە زەينەتاقى ءمينيسترى مەل سترايد.
قارجىلىق ساۋاتتىلىقتى ارتتىرۋمەن اينالىساتىن مەملەكەتتىك مەكەمەدەگىلەردىڭ ايتۋىنشا، ءاربىر جەتىنشى بورىشكەر ماسەلەنى شەشۋ ءۇشىن ەش ارەكەت ەتپەيدى. ال بۇل بولاشاقتا ولارعا ۇلكەن قيىندىقتار تۋعىزاتىنى ءسوزسىز. جاعدايدى كۇردەلەندىرمەۋ ءۇشىن ىڭعايلى تولەم سحەماسىن ۇسىناتىن كومپانياعا دەرەۋ حابارلاسۋلارى قاجەت. ساراپشىلار كەرىسىنشە، ينفلياتسيامەن كۇرەستى كۇشەيتۋ كەرەك دەيدى. ويتكەنى حالىقتىڭ تاپقان- تايانعانىن قىمباتشىلىق ەسەلەپ جۇتىپ جاتىر.
اۆتور
عالىمجان قارامان ۇلى
