ەلوردانىڭ قاي كوشەلەرىندە ءبىرجاقتى قوزعالىس ەنگىزىلەدى
استانا. KAZINORM - ەلوردا اكىمدىگى قالانىڭ قاي كوشەلەرىندە كولىكتەر ءۇشىن ءبىرجاقتى قوزعالىس ەنگىزۋ جوسپارلانعانىنا قاتىستى مالىمەتى جاريالادى.
«قونايەۆ، دوستىق، تۇركىستان جانە اقمەشىت كوشەلەرى بويىمەن ءبىرجاقتى قوزعالىس جوباسىن قاراستىرۋ اياسىندا بۇگىندە ساراپتاۋ، پروبلەما بولۋى مۇمكىن ۋچاسكەلەردى جانە جوبانى ەنگىزۋ بارىسىنداعى شىعىنداردى تومەندەتۋ نۇسقالارىن انىقتاۋ پروتسەدۋرالارى جۇرگىزىلىپ جاتىر»، - دەلىنگەن اگەنتتىك ساۋالىنا بەرىلگەن جاۋاپتا.
اكىمدىكتىڭ اتاپ وتۋىنشە، قازىرگى ۋاقىتتا قوزعالىس لەگىنىڭ ەلەكتروندى كولىك مودەلى ازىرلەنگەن.
«تاجىريبەدە ءبىرجاقتى قوزعالىس كوشەنىڭ وتكىزۋ قابىلەتىن ارتتىرۋعا جانە جولعا كەتەتىن ۋاقىتتى تومەندەتۋگە مۇمكىندىك بەرەدى. دەگەنمەن، جاپسارلاس كولىك- جول جەلىلەرىنە اسەرىن تومەندەتۋ ءۇشىن جان- جاقتى ساراپتاما قاجەت»، - دەپ ناقتىلايدى اكىمدىكتەن.
اتالعان كوشەلەردىڭ بويىندا تۇرعىن ۇيلەر مەن كەڭسە-جايلاردىڭ كوپ بولۋىنا بايلانىستى، سونىمەن قاتار حالىقپەن كەرى بايلانىس ورناتىپ، الەۋمەتتىك شيەلەنىستى تومەندەتۋ ماقساتىندا الدىن الا قوعامدىق تالقىلاۋ مەن تىڭداۋ وتكىزىلەدى. سونىڭ نەگىزىندە تۇپكىلىكتى شەشىم قابىلدانادى.
