ەلوردانىڭ باس يمامىنا قاتىستى ۆيدەو تاراتقان ازاماتقا 700 مىڭ تەڭگە ايىپپۇل سالىندى
استانا. KAZINFORM - ەلوردا تۇرعىنى الەۋمەتتىك جەلىدە ءزاۋلىم ءۇيدىڭ ۆيدەوسىن جاريالاپ، ول استانا قالاسىنىڭ باس يمامىنا تيەسىلى دەگەن اقپارات تاراتقان، ءبىراق ول راستالماي شىقتى.
استانا قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتى الەۋمەتتىك جەلىدە جالا جاپقانى ءۇشىن ب. ەسىمدى ازاماتقا قاتىستى ءىستى قارادى.
ب. ەسىمدى ازامات الەۋمەتتىك جەلىلەردە ءزاۋلىم ءۇيدىڭ ۆيدەوسىن جاريالاپ، ونىڭ حالىقتىڭ قايىرىمدىلىققا بەرگەن قاراجاتتارىنا سالىنعانىن جانە ءزاۋلىم ءۇي استانا قالاسىنىڭ باس يمامىنا تيەسىلى ەكەنىن ايتقان.
- سوتتا ب. - نىڭ وزگە ازاماتتىڭ ار- نامىسى مەن قادىر- قاسيەتىنە جانە بەدەلىنە نۇقسان كەلتىرەتىن مالىمەت تاراتقانىن انىقتادى. سوت وتىرىسىندا قۇقىق بۇزۋشى كىناسىن تولىق مويىنداپ، ءۇيدىڭ كىمگە تيەسىلى ەكەنىن، ونىڭ قانداي قاراجاتقا سالىنعانى وعان بەلگىسىز ەكەنىن ءتۇسىندىردى. سونىمەن قاتار بەينەجازبانى قارالىم ءۇشىن جاريالاعانىن ايتىپ، وكىنىش ءبىلدىردى، - دەپ حابارلايدى ەلوردا سوتى.
جابىرلەنۋشى ايىپتىنى زاڭ بويىنشا جازالاۋدى سۇرادى. سونداي-اق قۇقىق بۇزۋشىلىق فاكتىسى ءىس ماتەريالدارىمەن، اكىمشىلىك قۇقىق بۇزۋشىلىق تۋرالى حاتتامامەن، بەينەجازبامەن جانە جابىرلەنۋشىنىڭ ارىزىمەن راستالدى.
- سوت قاۋلىسىمەن ب. اكىمشىلىك قۇقىقبۇزۋشىلىق تۋرالى كودەكستىڭ 73-3- بابىنىڭ 2-بولىگى بويىنشا اكىمشىلىك قۇقىق بۇزۋشىلىق جاساعانى ءۇشىن كىنالى دەپ تانىلىپ، وعان 180 ا ە ك (707760 تەڭگە) مولشەرىندە ايىپپۇل سالىندى، - دەلىنگەن حابارلامادا.
سوت قاۋلىسى زاڭدى كۇشىنە ەنگەن جوق.
ايتا كەتەيىك، اتالعان جايتقا قاتىستى ۆيدەو الەۋمەتتىك جەلىدە تاراعان ەدى.
