ەلوردالىق تاكسيست شەتەلدىكتى اۋەجايدان قوناق ۇيگە 45 مىڭ تەڭگەگە اپارعان
استانادا شەتەلدىك ازاماتتى الداعان تاكسي جۇرگىزۋشىسى ۇستالدى، دەپ حابارلايدى Kazinform پوليتسياعا سىلتەمە جاساپ.
22-قاراشادا 102 ارناسىنا «ديپلومات» قوناق ءۇيىنىڭ اكىمشىسىنەن حابار ءتۇستى.
ول تاكسي جۇرگىزۋشىسىنىڭ ءۇندىستان ازاماتىنان ونى استانا اۋەجايىنان قوناقۇيگە جەتكىزگەنى ءۇشىن 45000 تەڭگە العانىن حابارلادى.
ىزدەۋ ءىس- شارالارىن وتكىزۋ بارىسىندا كولىكتەگى پوليتسيا دەپارتامەنتىنىڭ قىزمەتكەرلەرى ەلوردالىق تاكسوپاركتەردىڭ ءبىرىنىڭ جۇرگىزۋشىسىن ۇستادى.
ول شەتەلدىكتى الداپ، حالىقارالىق اۋەجايدان قوناقۇيگە دەيىنگى باعانى ادەيى كوتەرگەن.
تاكسي جۇرگىزۋشىسى ءوز كىناسىن مويىنداپ، زالالدى تولىق كولەمدە وتەدى.
قۇقىق بۇزۋشىعا قاتىستى ا ق ب ت ك- ءنىڭ 190-بابى بويىنشا اكىمشىلىك حاتتاما تولتىرىلىپ، 10 ا ە ك مولشەرىندە ايىپپۇل سالىندى.
سونداي- اق تاكسوپاركتىڭ اتىنا وسىنداي قۇقىق بۇزۋشىلىقتاردىڭ سەبەپتەرى مەن جاعدايلارىن جويۋ تۋرالى ۇسىنىس جىبەرىلدى.
