ەلوردالىق نەيروحيرۋرگتار ميعا بىرەگەي وپەراتسيا جاسادى
استانا. KAZINFORM - استاناداعى ۇلتتىق عىلىمي مەديتسينا ورتالىعىندا ميعا بىرەگەي وپەراتسيا جاسالدى، دەپ حابارلايدى 24kz.
جاس پاتسيەنتتىڭ قوس جانارىن ساقتاپ قالۋ ءۇشىن اقحالاتتىلار 13 ساعات تەر توكتى. كۇردەلى وتانىڭ ناتيجەسى قانداي؟
توقتار قالماحان ۇلى ميىندا ىسىك بارىن كەزدەيسوق بىلگەن. 18 جاستاعى جىگىتتىڭ وڭ كوزى سىر بەرە باستاعان سوڭ ول الدىمەن كوز دارىگەرىنە بارعان. ال وكۋليست كورۋ قابىلەتىنىڭ بۇزىلۋى ميداعى وزگەرىستەردەن بولۋى مۇمكىن دەپ ناۋقاستى نەيروحيرۋرگكە جىبەرەدى.
وسىلايشا، توقتار قالماحان ۇلى پورتالمەن كەزەككە تۇرىپ، تۇركىستاننان استاناداعى ۇلتتىق عىلىمي مەديتسينا ورتالىعىنا تۇسكەن. ءبىر اپتا بۇرىن ونىڭ باسىنا وتە كۇردەلى وپەراتسيا جاسالدى. ەلوردالىق نەيروحيرۋرگتار مي نەگىزىندە وسكەن ىسىكتى الۋعا 13 ساعات جۇمساعان.
سەرىك دۇيسەنبى، ۇلتتىق عىلىمي مەديتسينا ورتالىعىنىڭ نەيروحيرۋرگيا ءبولىمىنىڭ باسشىسى:
- كوردوما دەپ دياگنوز قويىپ وتىرمىز، ول ميدىڭ ىشىندەگى ىسىككە جاتپايدى. ميدىڭ استىڭعى نەگىزىندەگى كاۆەرنوز سينۋستىڭ قاپشىعىنىڭ ىشىندەگى ىسىككە جاتادى. بارلىق كوزدەرىن وراپ وسكەن. ونىڭ ۇستىنە كاراتۋت ارتەرياسىن وراپ وسكەن. سوعان مىسالى ميدىڭ قان اينالىسىن جاقسارتۋ ءۇشىن ميدىڭ سىرتقى قان تامىرى ميدىڭ ىشكى قان تامىرلارىن جالعاۋ ارقىلى قاندى سىرتىنان وتكىزىپ، سول ارقىلى كاۆەرنوز سينۋستىڭ ىشىندەگى ىسىكتى تولىعىمەن الىپ تاستاۋ وپەراتسياسىن جۇرگىزدىك.
ۇلكەن قاۋىپكە قاراماستان وپەراتسيا ءساتتى اياقتالدى. قازىر ەمدەلۋشىنىڭ قول-اياعى ساۋ، كوزى جاقسى كورەدى، جاعدايى وڭالدى. ىسىك ميدىڭ جۇرەك، كوز، قۇلاق، تىنىس الۋ قىزمەتتەرىنە جاۋاپ بەرەتىن بولىگىنە جاقىن ورنالاسقان. سوندىقتان ساۋ تىندەردى زاقىمداماي ىسىكتى الىپ تاستاۋ قيىنعا سوقتى دەيدى دارىگەر. ءبىراق ابىروي بولعاندا، وپەراتسيا وڭ ناتيجە بەردى.
سەرىك دۇيسەنبى، ۇلتتىق عىلىمي مەديتسينا ورتالىعىنىڭ نەيروحيرۋرگيا ءبولىمىنىڭ باسشىسى:
- مي نەگىزىنىڭ ىسىكتەرىندە كەڭىستىك ءسال كەڭ بولادى دا كوبىندە بايقالمايدى. سول ءۇشىن اۋرۋ بەلگىسى بايقالعان كەزدە دەر كەزىندە دوكتورعا كورىنۋ كەرەك. سىزدە كوزدە بولماسا ءيىس سەزۋدە، كوزىنىڭ كورۋى السىرەۋ، قۇلاعى ەستىمەۋ سول سياقتى جاعدايلار بولعاندا بىردەن ەڭ از دەگەندە ءبىر ك ت- عا ءتۇسىپ ميدى ءبىر قاراتا سالۋ كەرەك.
ۇلتتىق عىلىمي مەديتسينا ورتالىعىندا وسىنداي وپەرتسيالار 2020 -جىلدان بەرى جاسالادى. ەل ازاماتتارى ءۇشىن كۇردەلى وپەراتسيا مەديتسيتسنالىق ساقتاندىرۋ اياسىندا تەگىن. بۇدان بولەك، ورتالىق قانتامىر جانە مي نەگىزدەرىنىڭ ىسىكتەرىن ەمدەيدى.
