ەلوردادا پوليسەيلەر 84 جاستاعى قارتتىڭ 13 ميلليون تەڭگەسىن قولدى ەتكەن دروپپەلەردى ۇشاقتا ۇستادى
استانا. KAZINFORM - استانادا ءتارتىپ ساقشىلارى 84 جاستاعى قاريانى 13 ميلليون تەڭگەگە الداپ سوققان الاياقتىق سحەمانى اشكەرەلەدى، - دەپ حابارلايدى Polisia.kz.
بەلگىلى بولعانداي، قىلمىسكەرلەر جابىرلەنۋشىمەن بايلانىسىپ، وزدەرىن قۇقىق قورعاۋ ورگاندارىنىڭ قىزمەتكەرلەرى رەتىندە تانىستىرعان. ولار تەلەفون ارقىلى ەگدە جاستاعى ايەلگە ونىڭ اپكەسى جول-كولىك وقيعاسىنا كىنالى دەپ جالعان اقپارات جەتكىزگەن. جاراقات العان ادامدى شۇعىل ەمدەۋگە قاراجات قاجەت دەگەن سىلتاۋمەن الاياقتار ايەلدى قوماقتى سومانى قولما-قول تاپسىرۋعا كوندىرگەن.
الدانعانىن كەش تۇسىنگەن قاريا بىردەن پوليتسياعا جۇگىندى. جەدەل-ىزدەستىرۋ شارالارى بارىسىندا ءتارتىپ ساقشىلارى كۇدىكتىلەردى انىقتاپ، ولاردىڭ ەلدەن اۋە رەيسى ارقىلى كەتۋگە تىرىسىپ جاتقانىن انىقتادى. پوليتسەيلەر قاسكويلەردى تىكەلەي ۇشاق ىشىندە قولعا ءتۇسىردى. تەكسەرۋ بارىسىندا كۇدىكتىلەردەن 11 مىڭ ا ق ش دوللارىنان استام قارجى تاركىلەندى.
انىقتالعانداي، ولار اقشانىڭ ءبىر بولىگىن جۇمساپ ۇلگەرگەن. قازىرگى تاڭدا اتالعان دەرەك بويىنشا سوتقا دەيىنگى تەرگەۋ امالدارى جۇرگىزىلۋدە. كۇدىكتىلەر-كورشى ەلدىڭ ازاماتتارى. ولار استانا قالاسى پوليتسيا دەپارتامەنتىنىڭ ۋاقىتشا ۇستاۋ يزولياتورىنا قامالدى.
استانا قالاسى پوليتسيا دەپارتامەنتى ازاماتتاردى ساق بولۋعا شاقىرادى.
- قۇقىق قورعاۋ ورگاندارىنىڭ اتىن جامىلعان بەيتانىس ادامدارعا سەنبەۋگە، كۇماندى جاعدايلاردا جاقىندارىڭىزبەن كەڭەسىپ، بىردەن پوليتسياعا حابارلاسۋعا كەڭەس بەرەدى. اسىرەسە، ەگدە جاستاعى ادامداردىڭ الاياقتاردىڭ نەگىزگى نىساناسىنا اينالاتىنىن ەسكەرە وتىرىپ، ولارعا مۇنداي جاعدايلاردا قالاي ارەكەت ەتۋ كەرەكتىگىن ءتۇسىندىرۋ ماڭىزدى،- دەلىنگەن حابارلامادا.
