ەلوردادا تۇران داڭعىلىنىڭ ۋچاسكەسى ۋاقىتشا جابىلادى
استانا. KAZINFORM - تۇران داڭعىلىنىڭ ورىنبور مەن باعلانوۆا كوشەلەرىنىڭ ارالىعىنداعى بولىگىندە ينجەنەرلىك جەلىلەردى توسەۋ جۇمىسى جۇرگىزىلەدى. وسىعان بايلانىستى 21- اقپان مەن 9- ناۋرىز ارالىعىندا كولىك قوزعالىسى ەكى باعىتتا دا شەكتەلەدى، دەپ حابارلايدى استانا اكىمدىگىنىڭ رەسمي سايتى.
ىرگەلەس ۋچاسكەلەردە ءتيىستى جول بەلگىلەرى ورناتىلىپ، باعدارشامداردىڭ جۇمىس رەجيمدەرىنە تۇزەتۋلەر ەنگىزىلدى. قوسىمشا اقپاراتتىق بەلگىلەر ورناتىلدى.
بالامالى باعىتتار ايتماتوۆ كوشەسى مەن قابانباي باتىر داڭعىلى بولىپ سانالادى.
اتالعان ۋاقىتتا كەپتەلىستەردى ازايتۋ ءۇشىن قابانباي باتىر داڭعىلىنداعى اۆتوبۋس جولاقتارىمەن جۇرۋگە ۋاقىتشا رۇقسات ەتىلەدى. ولار بويىنشا قوزعالىس بۇزىلىستارىن تىركەۋ وشىرىلەدى. 26- 27-40- قالالىق اۆتوبۋستاردىڭ باعىتى وزگەرتىلدى.
جول قاۋىپسىزدىگى ماقساتىندا پوليتسيا دەپارتامەنتى جۇرگىزۋشىلەرگە وتە مۇقيات بولىپ، مارشرۋتتى الدىن الا جوسپارلاۋ قاجەت ەكەنىن ەسكەرتەدى.
