ەلوردادا قىزىلشا بويىنشا ەپيدەميولوگيالىق جاعداي تۇراقسىز

بۇل تۋرالى استانا قالاسىنىڭ سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى جاننا پراليەۆا مالىمدەمە جاسادى.

«22- قاراشاداعى مالىمەت بويىنشا قىزىلشا اۋرۋى 1648 ناۋقاستا تىركەلىپ جانە 639 ناۋقاستا راستالعان. ونىڭ ىشىندە ەرەسەكتەر اراسىندا 123 جاعداي، 15-19 جاستاعى جاس وسپىرىمدەر اراسىندا 39 جاعداي تىركەلدى.

14 جاسقا دەيىنگى بالالار اراسىندا 474 جاعداي تىركەلدى، ياعني 74 پايىزدى قۇرايدى. ونىڭ ىشىندە ەڭ كوپ جاعداي ءتورت جاسقا دەيىنگى بالالارعا تيەسىلى، ياعني 383 جاعداي نەمەسە 80 پايىز. وسى، 383 جاعدايدىڭ ىشىندە 90 جاعداي، ول 1 جاسقا دەيىنگى نارەستەلەردىڭ اراسىندا، بۇل بالالار ەكپە الاتىن جاسقا تولماعان»، - دەدى ول.

ونىڭ سوزىنشە، ناۋقاستاردىڭ ىشىندە قىزىلشاعا قارسى ەكپە العاندار تەك 5 پايىزدى قۇراعان (34 جاعداي).

ۆاكسينا الماعانداردىڭ ۇلەس سالماعى 95 پايىز (605 جاعداي). ونىڭ ىشىندە:

- ۆاكسيناتسيادان ءوز ەركىمەن باس تارتۋ سەبەبى بويىنشا 42,3 پايىز (256 جاعداي)؛

- مەديتسينالىق قارسى كورسەتىلىمى بويىنشا 21,4 پايىز (129 جاعداي)؛

- ەرەسەكتەردىڭ 21,4 پايىزىندا (130 جاعداي) ۆاكسيناتسيا تۋرالى دەرەكتەردىڭ جوق بولۋى.

- ەگۋ جاسىنا جەتپەگەن 1 جاسقا دەيىنگى بالالار 14,9 پايىز (90 جاعداي).

ەستەرىڭىزگە سالا كەتەيىك، بۇگىنگى كۇنى ۇلتتىق پروفيلاكتيكالىق ەگۋ كۇنتىزبەسىنە سايكەس قىزىلشاعا قارسى ەكپە ەكى رەت جۇرگىزىلەدى: ول 1 جاستا جانە 6 جاستا.

قىزىلشا وتە جۇقپالى اۋرۋ جانە كوپ ۇجىمدا، اسىرەسە مەكتەپكە دەيىنگى بالالار ۇيىمدارىندا، مەكتەپتەردە، جوعارى وقۋ ورىندارىندا ءجيى تىركەلەدى. كوبىنەسە قىزىلشا ۆاكسينا الماعان بالالار اراسىندا باسىم بولادى. ماسەلەن، ۇيىمداسقان ۇجىمداردا:

- 66 بالاباقشادا 106 راستالعان جاعداي. ونىڭ ىشىندە، 96 بالا ەكپە الماعان. شەكتەۋ شارالارىمەن بۇگىنگى تاڭدا 15 بالاباقشا جۇمىس ىستەپ جاتىر.

- 37 مەكتەپتە 52 راستالعان جاعداي. ونىڭ ىشىندە، 45 ىندە ۆاكسيناتسيا بولعان جوق.

- 5 جوعارى وقۋ ورنى اراسىندا 27 جاعداي تىركەلدى.

«پروفيلاكتيكالىق ەكپەلەردەن باس تارتۋدىڭ كوبەيۋى، مەديتسينالىق قارسى كورسەتىلىم بويىنشا جانە يممۋنداۋمەن قامتۋدىڭ تومەندىگى حالىقتىڭ يممۋندىق ەمەس قاباتتىڭ پايدا بولۋىنا اكەلىپ سوقتى. ەگۋ جاسىنا جەتپەگەن 1 جاسقا دەيىنگى بالالار اراسىندا قىزىلشا اۋرۋىنىڭ كوپتەپ تىركەلۋىنە بايلانىستى ق ر باس مەملەكەتتىك سانيتاريالىق دارىگەرىنىڭ قاۋلىسى شىعارىلدى. وندا 6 ايدان 10 اي 29 كۇنگە دەيىن دەيىنگى بالالاردى ەگۋ كورسەتىلگەن. بۇگىنگى تاڭدا وسى جاستاعى 2500 دەن استام بالا ەكپە الدى. وسى ورايدا، اتا-انالاردى بالالارىڭىزدىڭ دەنساۋلىعىنا نەمقۇرايلى قاراماي، ۆاكسينا الۋعا شاقىرامىن. سەبەبى، بالاڭىزدىڭ سالاۋاتتى ءومىر ءسۇرۋى ءسىزدىڭ جاۋاپكەرشىلىگىڭىزدە!» - دەدى جاننا پراليەۆا.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى