ەلوردادا قۇرىلىس كومپانيالارى وبەكت اۋماعىن ءۇش جىل بويى كوگالداندىرۋعا مىندەتتى

- بيىل 170 قوعامدىق جانە اۋلا كەڭىستىكتەرىن اباتتاندىرۋ جۇمىستارى اياقتالدى. ونىڭ ىشىندە ۇلىتاۋ اللەياسى، ماڭگىلىك ەل، تاۋەلسىزدىك، تۇران داڭعىلدارى، قازاق ەلى الاڭى، مىڭجىلدىق اللەياسىنىڭ ءبىر بولىگى، جۇرگەنوۆ اللەياسىنداعى سكۆەر، ەسكى ۆوكزال اۋماعى مەن وعان ىرگەلەس گەتە جانە ءبىرجان سال كوشەلەرى، جاستار ساياباعى، سونداي-اق «كەرۋەن» جانە «حان شاتىر» ساۋدا ورتالىقتارىنىڭ جانىنداعى سكۆەرلەر اباتتاندىرىلىپ، كوگالداندىرىلدى. سونىمەن قاتار، اقبۇلاق جاعالاۋى، پرەزيدەنت ساياباعى جانە بەيبىتشىلىك پەن كەلىسىم ساياباعى كىرەتىن ەسىل وزەنىنىڭ بويىنداعى ساياباقتار كلاستەرى اباتتاندىرىلىپ جاتىر. سونداي-اق، جاعالاۋ شاعىن اۋدانىندا 18 گەكتار اۋماقتى كەشەندى اباتتاندىردىق، - دەدى ەلوردا اكىمى جەڭىس قاسىمبەك ەلوردانىڭ الەۋمەتتىك-ەكونوميكالىق دامۋى تۋرالى ەسەپ بەرە تۇرىپ.

اكىمنىڭ ەسەبىنشە، بيىل قالا مەن «جاسىل بەلدەۋ» اۋماعىندا شامامەن 1 ميلليون جاسىل جەلەك وتىرعىزىلدى. ولاردىڭ ىشىندە ەلوردا كليماتىنا بەيىمدەلگەن ەۋروپالىق اعاش تۇرلەرى دە بار.

- قالانى كوگالداندىرۋ جارعىسى قابىلداندى. ەندى بىردە-ءبىر قۇرىلىس سالۋشى دەندروپلاندى ىسكە اسىرماي جانە وبەكتى اينالاسىنداعى جاسىل جەلەكتى ءۇش جىل بويى كۇتىپ-باپتاۋ بويىنشا مىندەتتەردى وزىنە الماي، وبەكتىنى تاپسىرا المايدى، - دەيدى ول.

بۇعان دەيىن جەڭىس قاسىمبەك بيىل ەلوردانىڭ جەكە تابىسى 1 تريلليون تەڭگەدەن اسقانىن ايتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى