ەلوردادا مومىش ۇلىنىڭ كىتاپتارى، حاتتارى مەن كارتالارى قويىلعان كورمە اشىلدى

- بۇگىنگى كورمەگە مۋزەيىمىزدەن باۋىرجان مومىش ۇلىنىڭ كۇندەلىگىن جانە جاۋىنگەرلىك كارتاسىنىڭ ءتۇپنۇسقاسىن الىپ كەلىپ وتىرمىز. ول كىسى 1945-جىلى قاڭتار ايىنان باستاپ 9-گۆارديالىق ديۆيزيا كومانديرى بولدى، اقپان-ناۋرىز ايلارىندا ۇرىستارعا قاتىستى. بۇل كارتانى سول كەزدە سىزعان ەكەن. ودان بولەك كىتاپتارىن، كۇندەلىگىن ۇسىندىق. باۋىرجان اتامىز قانداي قيىن كەزدەردە دە كۇندەلىك جازۋىن توقتاتپاعان. كەيىن سول كۇندەلىكتەردى نەگىزگە الا وتىرا 20 دان استام كىتاپ جازىپ شىققان. سوعىس جىلدارى جالپى 38 كۇندەلىكتى تولتىرىپ بىتكەن ەكەن. سونىڭ بىرەۋىن بۇگىن كورمەگە اكەلىپ وتىرمىز، - دەدى ۇلتتىق اسكەري-پاتريوتتىق ورتالىعى باستىعىنىڭ ورىنباسارى، اسكەري-تاريحي مۋزەيىنىڭ باستىعى مايور داۋلەت قادىروۆ.

كورمەگە سونداي-اق ب. مومىش ۇلىنىڭ جەكە كۇندەلىگى، 1955-1956-جىلدارى كالينين قالاسىندا پايدالانعان بلوكنوتى، پورترەتى، فوتوسۋرەتتەرى جانە باتىردىڭ ەرلىگى تۋرالى جازىلعان كوركەم تۋىندىلار مەن ەكىنشى دۇنيەجۇزىلىك سوعىس جايلى تاريحي كىتاپتار قويىلدى.

- بۇل كورمەگە باۋىرجان مومىش ۇلىنىڭ 32 تومدىق ەڭبەگى قويىلدى. بۇرىن 30 توم بولاتىن، كەيىنگى جىلدارى تولىقتىرىلىپ، 32 تومعا جەتكىزىلدى. سونىڭ 6 تومى ءوزى جازعان حاتتاردان تۇرادى. قازاق ادەبيەتىندە ەپيستوليارلىق جانر كەنجە دامىعان. ال باۋىرجان مومىش ۇلى وسى جانردى شىڭداعان جازۋشىلاردىڭ ءبىرى. وعان وسى 6 تومعا جەتەتىن حاتتارى دالەل. ونىڭ ىشىنە 1930-جىلدان باستاپ ءومىرىنىڭ سوڭىنا دەيىن جازىلعان حاتتار جيناقتالعان، - دەيدى قولجازبالار جانە سيرەك كىتاپتار ۇلتتىق ورتالىعى عىلىمي زەرتتەۋ جۇمىستارىن ۇيىمداستىرۋ ءبولىمىنىڭ جەتەكشى مامانى گۇلسىم بيسەنوۆا.

قولجازبالار جانە سيرەك كىتاپتار ۇلتتىق ورتالىعىندا اشىلعان كورمەنى ۇيىمداستىرۋعا ق ر قارۋلى كۇشتەرى ۇلتتىق اسكەري-پاتريوتتىق ورتالىعى اتسالىسقان. شارا ۇلى جەڭىستىڭ 80 جىلدىعى، داڭقتى قولباسشى، اسكەري قايراتكەر، جازۋشى، كەڭەس وداعىنىڭ باتىرى باۋىرجان مومىش ۇلىنىڭ تۋعانىنا 115 جىل تولۋىنا وراي ۇيىمداستىرىلدى.

ايتا كەتەيىك، بۇعان دەيىن ەلوردادا باۋىرجان مومىش ۇلىنىڭ سوعىستا قولدانعان زاتتارى قويىلعان كورمە وتكەن ەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى