ەلوردادا ۇلتتىق تاعام زالى مەن قابىلداۋ ءۇيى سالىنادى
استانا. KAZINFORM - ەلوردادا قالالىق ينفراقۇرىلىمدى دامىتۋ قارقىندى جالعاسىپ جاتىر. ماسەلەن، استانانىڭ قالالىق ورتا ساپاسى جانە باقىلاۋ باسقارماسى Kazinform ساۋالىنا وراي 2 نىسان قۇرىلىسىنىڭ جۇرگىزىلىپ جاتقانىن مالىمدەدى.
اتالعان نىسانداردىڭ ءبىرىنشىسى - مەيرامحانا كەشەنى بار ۇلتتىق تاعامداردىڭ كورمە زالى. ول ج. ناجيمەدەنوۆ پەن ق. امانجولوۆ كوشەلەرىنىڭ قيىلىسىندا، تاۋەلسىزدىك سارايىنا جاقىن ماڭدا سالىنادى. ۋچاسكە اۋدانى 0,6112 گەكتار.
- Elicense.kz اقپاراتتىق بازاسىنىڭ دەرەكتەرىنە سايكەس، قۇرىلىس سالۋشى «باراپ» ج ش س قۇرىلىس-مونتاج جۇمىستارىنىڭ باستالعانى تۋرالى حابارلاما بەردى، - دەپ اتاپ ءوتتى اكىمدىكتەن.
ەكىنشى نىسان - قابىلداۋ ءۇيى. ول ج. ناجيمەدەنوۆ پەن ش. قالداياقوۆ كوشەلەرىنىڭ قيىلىسىندا، پرەزيدەنت ساياباعى اۋماعىندا سالىنادى. جەر ۋچاسكەسى پرەزيدەنت ءىس باسقارماسىنا ىزدەۋ جانە جوبالاۋ جۇمىستارىن جۇرگىزۋ ءۇشىن استانا اكىمدىگىنىڭ قاۋلىسى نەگىزىندە 2029 -جىلدىڭ 25 ماۋسىمىنا دەيىن بەرىلگەن.
اكىمدىكتىڭ اتاپ وتۋىنشە، مۇنان بولەك، قالادا الەۋمەتتىك نىساندار - مەكتەپتەر، بالاباقشالار، وقۋشىلار سارايى جانە وزگە دە قوعامدىق ماقساتتاعى مەكەمەلەردىڭ قۇرىلىسى جۇرگىزىلىپ جاتىر. ايتالىق، وسى جىلدىڭ تامىزىندا ەلوردادا 28 مىڭ ورىنعا ارنالعان 7 جايلى مەكتەپ قۇرىلىسى اياقتالادى. 2029 -جىلعا دەيىن، 2026-2028 -جىلدارى ارالىعىندا ەكى اۋىسىمدا 157 مىڭ وقۋشىعا ءبىلىم بەرەتىن 63 مەكتەپ سالۋ جوسپارلانعان.
قازىرگى ۋاقىتتا اكىمدىك ينجينيرينگتىك جانە قۇرىلىس كومپانيالارىمەن جۇمىس كەزدەسۋلەرىن وتكىزىپ جاتىر. ونىڭ ماقساتى - ساۋلەت، قۇرىلىس جانە قالا قۇرىلىسى نورمالارىنىڭ بۇزىلۋىن ەسكەرتۋ.
بۇعان دەيىن ەلورداداعى مۇڭايتپاسوۆ ستاديونى مەن «قازاقستان» سپورت سارايىنىڭ قۇرىلىسى قاشان اياقتالاتىنىن جازعان ەدىك.
اۆتور
مارلان جيەمباي
