ەلوردادا العاش رەت ەلەكتروساموكاتتارعا ارنالعان ارنايى تۇراقتار اشىلادى
استانا. KAZINFORM - استانادا العاش رەت ەلەكتروساموكاتتارعا ارنالعان ارنايى تۇراق ايماقتارى اشىلادى. جوبا پيلوتتىق رەجيمدە نۇرا اۋدانىندا ىسكە اسىرىلماق. ول ءۇشىن ساموكاتتار جيى تاستالىپ كەتەتىن ون ورىن تاڭدالىنادى، دەپ حابارلايدى ەلوردا اكىمدىگىنىڭ رەسمي سايتى.
تۇراقتار ارنايى جول بەلگىلەرىمەن جانە سىزىقتىق بەلگىلەۋمەن بەلگىلەنەدى. كيكشەرينگ پايدالانۋشىلارى ساپارلارىن ءدال وسى جەرلەردە اياقتاۋى ءتيىس. بۇل تروتۋار مەن جول جيەگىندە بەي-بەرەكەت تاستالعان ساموكاتتارعا قاتىستى شاعىمداردى ازايتۋعا كومەكتەسەدى.
- استانالىقتاردان كەلىپ تۇسەتىن ەڭ ءجيى شاعىمداردىڭ ءبىرى - بەي-بەرەكەت تاستالعان ساموكاتتار. ارنايى تۇراق ايماقتارى وسى ماسەلەگە ءتارتىپ ورناتىپ، قالادا قوزعالىستى قاۋىپسىز ەتەدى، - دەپ اتاپ ءوتتى نۇرا اۋدانىنىڭ اكىمدىگى.
بۇل جۇمىسقا iKomek جەدەل ارەكەت ەتۋ جانە مونيتورينگ ورتالىعى دا قوسىلدى. ورتالىقتا ساموكاتتاردىڭ دۇرىس قويىلماۋىنا بايلانىستى شاعىمداردى جەدەل وڭدەۋ ءۇشىن جاڭا جىكتەۋ جۇيەسى ازىرلەنىپ، وپەراتورلارعا ارنايى وقىتۋ جۇرگىزىلمەك.
باستامانى Q88 اۋماقتاردى تۇراقتى دامىتۋ قاۋىمداستىعى مەن ەلورداداعى بارلىق كيكشەرينگ كومپانياسى قولدادى.
ەلەكتروساموكات جۇرگىزۋ مادەنيەتى مەن قاۋىپسىزدىگىن ارتتىرۋ ماقساتىندا جول كارتاسى دا ازىرلەندى. قالالىق باسقارمالار، پوليتسيا جانە كيكشەرينگ كومپانيالارىمەن بىرلەسە وتىرىپ، اقپاراتتىق كامپانيالار، قاۋىپسىز جۇرگىزۋ بويىنشا ساباقتار جانە ەرەجە بۇزۋشىلىقتاردى انىقتاۋ رەيدتەرى ۇيىمداستىرىلادى.
بۇعان دەيىن قازاقستاندا ەلەكتروساموكاتتارعا ءنومىر تاعۋ مىندەتتەلۋى مۇمكىن ەكەنىن جازعان بولاتىنبىز.
