ەلوردا ىرگەسىندەگى اۋىلداردا تۇراقتى جۇمىس ورىندارىن اشۋ قاجەت - ۇكىمەت
استانا. KAZINFORM - ۇكىمەت وتىرىسىندا استانا اگلومەراتسياسىن دامىتۋدىڭ 2024-2028 -جىلدارعا ارنالعان كەشەندى جوسپارىنىڭ جوباسى ماقۇلداندى.
«قالاعا جاقىن ماڭداعى ەلدى- مەكەندەردە حالىق سانىنىڭ كۇرت ءوسۋى مەن ەلورداعا كۇندەلىكتى كەلىپ-كەتەتىن ادامداردىڭ لەگى اگلومەراتسيانىڭ نەگىزگى پروبلەمالارى بولىپ تابىلادى. بۇل استانا قالاسىنىڭ ينفراقۇرىلىمى مەن ەكولوگياسىنا جانە قاۋىپسىزدىگىنە تۇسەتىن جۇكتەمەنى ەداۋىر ارتتىرادى. ادامدار ەلورداعا جاقىن ماڭدا تۇرعىسى كەلەدى. ونى تۇسىنۋگە بولادى. الايدا، مۇنداي كوشى-قون ەڭبەك نارىعىنا اسەرىن تيگىزەدى، وبلىستا جۇمىسسىزدىقتىڭ وسۋىنە ىقپال ەتەدى. سوندىقتان، اتالعان پروبلەمالاردى شەشۋ ءۇشىن اۋقىمدى جۇمىس جاساۋعا تۋرا كەلەدى. ۇسىنىلىپ وتىرعان كەشەندى جوسپار وسى باعىتتاعى نەگىزگى باعدارلامالىق قۇجات بولادى»، — دەدى پرەمەر-مينيستر ولجاس بەكتەنوۆ اتالعان جوبانى تالقىلاۋ بارىسىندا.
ونىڭ ايتۋىنشا، قالا ماڭىنداعى اۋىلداردىڭ سۋمەن قامتاماسىز ەتۋ، سۋ بۇرۋ، ەلەكترمەن جابدىقتاۋ، جولداردىڭ جاي-كۇيى سياقتى وزدەرىنىڭ پروبلەمالارى دا بارشىلىق.
«بۇل رەتتە جوسپاردى ىسكە اسىرۋ وسىنداي وزەكتى پروبلەمالاردىڭ دا شەشىمىن تابۋعا ءتيىس دەپ سانايمىن. سونىمەن قاتار، ەلوردا ىرگەسىندەگى اۋىلداردا تۇراقتى جۇمىس ورىندارىن اشۋ قاجەت. استانا قالاسى اگلومەراتسيانىڭ وزەگى رەتىندە ىرگەلەس جاتقان اۋماقتاردىڭ ورنىقتى دامۋىنا نەگىز بولادى. بۇل ەلوردا مەن وعان جاقىن ماڭداعى ەلدى مەكەندەردىڭ تۇرمىس دەڭگەيىنىڭ اراسىنداعى تەڭگەرىمسىزدىكتى ازايتۋعا مۇمكىندىك بەرەدى»، — دەدى ۇكىمەت باسشىسى.
پرەمەر-ءمينيستردىڭ سوزىنە قاراعاندا، كەشەندى جوسپاردى ىسكە اسىرۋ كەزىندە كولىك-كوممۋنيكاتسيا، ساۋدا-لوگيستيكا، ينجەنەرلىك-كوممۋنالدىق جانە الەۋمەتتىك ينفراقۇرىلىمنىڭ ءبىرتۇتاس كەشەنىن قۇرۋ ءۇشىن ينۆەستيتسيالار تارتۋعا قولايلى جاعداي جاساۋ كەرەك. اگلومەراتسيانىڭ نەگىزگى ماقساتى دا وسى بولۋعا ءتيىس. سونداي- اق، 45 اۋىلدىق ەلدى مەكەننىڭ ءارقايسىسىنا وزىندىك ەكونوميكالىق ەرەكشەلىك بەرۋ قاجەت.
«سول كەزدە اۋىلدارمەن قاتار، استانا قالاسى دا مال جانە وسىمدىك شارۋاشىلىعىنىڭ، قۇرىلىس يندۋسترياسىنىڭ، سونداي-اق باسقا دا سالالاردىڭ قاجەتتى ونىمدەرىمەن ءوزىن-ءوزى قامتاماسىز ەتۋگە قول جەتكىزە الادى. ءالى كۇنگە دەيىن ەلوردا اينالاسىندا ازىق-تۇلىك بەلدەۋىن قۇرۋ ماسەلەسى تولىعىمەن شەشىلگەن جوق. ونى مويىنداۋ كەرەك. ونى وسى ەلدى مەكەندەردە جاساۋعا بولادى. جالپى، بارلىق ءىس-شارالاردى جاۋاپتى ءارى ساپالى ىسكە اسىرۋ ەلوردا مەن قالا ماڭىنداعى ايماقتاردىڭ ەكونوميكالىق دامۋ تيىمدىلىگىن ارتتىرۋعا مۇمكىندىك بەرەدى»، - دەدى ول.
وسىدان كەيىن ۇكىمەت باسشىسى ارىپتەستەرىن ۇسىنىلعان جوبانى ماقۇلداۋعا جانە ءتيىستى قاۋلىعا داۋىس بەرۋگە شاقىردى. وسىلايشا، ۇكىمەت مۇشەلەرى قۇجاتتى ماقۇلدادى.
«اقمولا وبلىسى مەن استانا قالاسىنىڭ اكىمدىكتەرى مۇددەلى مەملەكەتتىك ورگاندارمەن بىرلەسىپ، كەشەندى جوسپارداعى ءىس- شارالاردىڭ ۋاقتىلى جانە ساپالى ورىندالۋىن قامتاماسىز ەتۋى قاجەت. قارجى مينيسترلىگىنە اكىمدىكتەرمەن جانە مۇددەلى مەملەكەتتىك ورگاندارمەن بىرلەسىپ، جوسپاردىڭ ءىس- شارالارىن ۋاقتىلى قارجىلاندىرۋدى قامتاماسىز ەتۋدى تاپسىرامى»، - دەدى ولجاس بەكتەنوۆ.
