«ەلوردا جاستارى»: استانالىق جاستار باعدارلاما بويىنشا باسپانالى بولىپ جاتىر

ەنەرگەتيكا سالاسىندا 2014 -جىلدان بەرى جۇمىس ىستەيتىن ەلوردالىق تۇرعىن سايان شاكەنوۆ وتباسىنىڭ قالاي باسپانالى بولعانىن ايتىپ بەردى. ول 2019 -جىلى وتباسىمەن ساتىپ الۋ قۇقىعىنسىز جالعا بەرىلەتىن تۇرعىن ءۇي باعدارلاماسىنا قاتىسىپ، بەرىلگەن پاتەردە بەس جىل تۇرعان.

- ول كەزدە جاڭادان ءسابيلى بولىپ ەدىك، پاتەر جالداپ جۇردىك. سۇرانىسقا يە 100 ماماندىقتىڭ تىزىمىندە بولعاندىقتان، باعدارلاماعا قاتىسىپ كورمەك بولدىم. بارلىعى ونلاين رەجيمدە بولدى - قۇجاتتاردى قاشىقتان تاپسىرىپ، ىرىكتەۋدەن وتتىك. وسىلايشا بەس جىل جالدامالى باسپانادا تۇردىق. وسى ۋاقىت ىشىندە ءبىراز اقشا جيناپ الدىق، - دەيدى سايان شاكەنوۆ.

2024 -جىلى وتباسى «ەلوردا جاستارى» باعدارلاماسىنا قاتىسۋعا ءوتىنىش بەرىپ، ماقۇلداندى. ساياننىڭ تۇراقتى جالاقىسى، جاقسى نەسيە تاريحى جانە زەينەتاقى جيناقتارى ىرىكتەۋدەن العاشقىلاردىڭ ءبىرى بولىپ وتۋىنە مۇمكىندىك بەردى.

- قاراجاتىمنىڭ ءبىر بولىگىن «وتباسى بانككە» اۋداردىم، وعان قوسا ءوز جيناعىم دا بولدى. وسىنىڭ ءبارى بىزگە يپوتەكا الۋعا كومەكتەستى. باعدارلامانىڭ ارقاسىندا ءوز پاتەرىمىزدى الدىق. جاس وتباسى ءۇشىن ەڭ وزەكتى ماسەلەلەردىڭ ءبىرى - پاتەر ساتىپ الۋ. وسى قيىندىقتى شەشۋ ءۇشىن مەملەكەت جاستارعا كەرەمەت مۇمكىندىك بەرىپ جاتقانىنا وتە قۋانىشتىمىز، - دەدى ول.

وسى رەتتە ايتا كەتەيىك، «ەلوردا جاستارى» باعدارلاماسى بويىنشا جاستارعا جىلدىق 5 پايىزبەن جەڭىلدەتىلگەن نەسيە بەرىلىپ جاتىر.

نەسيەنىڭ ماكسيمالدى سوماسى - 20 ميلليون تەڭگەگە دەيىن، باستاپقى جارنا - %10، نەسيە مەرزىمى - 19 جىلعا دەيىن.

باعدارلاماعا قاتىسۋشىلار باسپانانى جاڭادان نەمەسە جىلجىمايتىن مۇلىك نارىعىنان ساتىپ الا الادى.

2023 -جىلدىڭ ناۋرىز ايىنان باستاپ قاتىسۋدىڭ جاس شەگى 34 جاسقا دەيىن ۇلعايتىلدى، بۇل باعدارلاماعا كوبىرەك جاس مامانداردىڭ قاتىسۋىنا مۇمكىندىك بەردى.

2024 -جىلدىڭ باسىنان بەرى جالعا الۋ شارتتارى جارامدى 778 جاس استانالىق نەسيەلەۋ راسىمىنەن وتۋگە جىبەرىلدى. ءساۋىر ايىنىڭ باسىندا ولاردىڭ 370- ءى تولەم قابىلەتتىلىگىن راستاسا، 200 قاتىسۋشى باسپانا يەسى اتاندى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى