لوندونداعى ورتا مەكتەپتە قازاق مادەنيەتى تانىستىرىلدى

سارا-دجەين كەننەدي اعىلشىن ءتىلىنىڭ مۇعالىمى. بۇگىن ول ءوزى ءبىلىم بەرەتىن قازاق وقۋشىلارىنىڭ مادەنيەتىمەن ەتەنە تانىستى. ۇلتتىق تاعامداردان اۋىز ءتيىپ، ءتىپتى قامزول مەن ساۋكەلە كيدى.

«ادەتتە مەكتەپ فورماسىن كيىپ كەلگەن وقۋشىلارىمىزدىڭ قاي ەلدىڭ وكىلى ەكەنىن كەيدە اڭعارا بەرمەيمىز. بۇگىنگى شارانىڭ ارقاسىندا قازاقستاننىڭ سالت-داستۇرلەرى تۋرالى ءبىلىپ جاتىرمىن»، - دەيدى باستاۋىش سىنىپ مۇعالىمى سارا-دجەين كەننەدي.

ۇلى بريتانيا مەكتەپتەرىندە وقۋ جىلى شىلدەنىڭ سوڭىندا اياقتالادى. جازعى كانيكۋل الدىنداعى ايتۋلى شارالاردىڭ ءبىرى وسى ۇلتتار كۇنى.

«باۋىرساق وتە ءدامدى ەكەن. بىزدە دە وسىعان ۇقساس تاعام ءتۇرى بار. قازاقستان تۋرالى كوپ بىلە بەرمەيمىن. سىزدەردىڭ ارقالارىڭىزدا اقپارات الىپ جاتىرمىن»، - دەيدى يامايكالىق اتا-انا اماندا رايت.

كاۋسار جانە الماسبەك قارامان حالىقارالىق جۋرناليستەردىڭ بالالارى. لوندوندا ۋاقىتشا تۇرىپ جاتىر. مەكتەبىندەگى جالعىز قازاق ۇلتىنىڭ وكىلدەرى. لوندونداعى شەتەلدىكتەرگە تۋعان جەرىن ناسيحاتتاپ ءجۇر. حيۋ ميددلتون اتىنداعى مەكتەپتە ولاردان بولەك ونداعان ۇلت وكىلى وقيدى. بارلىعى تاڭەرتەڭنەن ۇلتتىق كيىمدەرىن كيىپ كەلىپ، سىنىپتاستارىنا تاريحي وتانى تۋرالى اقپارات بەردى.

«ءبىز پالەستينانىڭ وكىلدەرىمىز. ەلىمىزدىڭ مادەني مۇرالارىن كورسەتكىمىز كەلدى. مىناۋ تاياۋ شىعىستان اكەلىنگەن قۇرما جەمىسى. ۇلتتىق سۋسىنىمىز قارا شايمەن ءىشسىن دەپ الىپ كەلدىك»، — دەيدى پالەستينالىق اتا-انا فادي الرايس.

يتاليالىق اتا-انا ماريو پەترۋني بۇگىن بالالارعا يتاليانىڭ ۇلتتىق تاعامى پيتستسا ءپىسىرىپ ۇيرەتكەنىن ايتتى. ونىڭ ايتۋىنشا، قازاقتار سياقتى ولار دا ۇننان جاسالاتىن تاعام تۇرلەرى كوپ.

ۇلى بريتانيا - كوپ ۇلتتى مەملەكەت. اعىلشىن، شوتلاند، يرلاند جانە ۋەلس حالقىنان بولەك بۇرىنعى وتار مەملەكەتتەرىنەن قونىس اۋدارعان ۇلتتاردىڭ ۇرپاقتارى دا تۇرادى. جەرگىلىكتى ۇكىمەت ولاردىڭ ءتىلى، ءدىنى جانە داستۇرلەرىنىڭ ساقتالۋىنا ەرەكشە ءمان بەرەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى