لوندونداعى ەڭ ءىرى اۋەجاي ءورت سالدارىنان ءبىر تاۋلىككە جابىلدى

- لوندونداعى «حيتروۋ» اۋەجايىن ەلەكتر قۋاتىمەن قامتاماسىز ەتەتىن قوسالقى ستانساداعى ورتكە بايلانىستى اۋەجايدا ەلەكتر ەنەرگياسىنىڭ ايتارلىقتاي ءۇزىلۋى بايقالىپ وتىر. جولاۋشىلار مەن اۋەجاي قىزمەتكەرلەرىنىڭ قاۋىپسىزدىگىن قامتاماسىز ەتۋ ماقساتىندا اۋەجاي 21- ناۋرىز كۇنى ساعات 23:59 عا دەيىن جابىق بولادى. جولاۋشىلارعا اۋەجايعا بارۋدان باس تارتىپ، قوسىمشا اقپارات الۋ ءۇشىن وزدەرىنىڭ اۋە كومپانيالارىمەن بايلانىسۋ ۇسىنىلادى. اۋەجاي اكىمشىلىگى كەلتىرىلگەن قولايسىزدىقتار ءۇشىن كەشىرىم سۇرايدى، - دەلىنگەن اۋەجايدىڭ رەسمي سايتىنداعى حابارلامادا.

BBC مالىمەتىنشە، لوندون ءورت قىزمەتى جەرگىلىكتى ۋاقىت بويىنشا تاڭعى ساعات 9:00 دە حەيس قالاسىنداعى قوسالقى ستانساداعى ءورتتىڭ «باقىلاۋعا الىنعانىن» حابارلادى. ءورتتى سوندىرۋگە 70 كە جۋىق ءورت ءسوندىرۋشى جۇمىلدىرىلعان. ءورت قىزمەتىنىڭ حابارلاۋىنشا، قوسالقى ستانساداعى ترانسفورماتور جانعان.

وسى جاعدايعا بايلانىستى ونداعان اۋە كومپانياسى لوندونعا باعىتتالعان رەيستەرىن توقتاتۋعا ءماجبۇر بولدى. ۇشۋلارىن توقتاتقان كومپانيالاردىڭ قاتارىندا بريتاندىق Virgin Atlantic جانە British Airways، يرلانديالىق Aer Lingus، امەريكالىق United Airlines، ءۇندىستاندىق Air India جانە گونكونگتىڭ Cathay Pacific اۋە كومپانيالارى بار.

Reuters اگەنتتىگىنىڭ باعالاۋى بويىنشا، بۇل جاعدايدان 60 تان استام اۋە كومپانياسىنىڭ 700 گە جۋىق رەيسى زارداپ شەكتى.

«حيتروۋ» اۋەجايىنا ۇشىپ شىققان رەيستەردىڭ كەيبىرى باستاپقى اۋەجايلارىنا قايتارىلدى نەمەسە باسقا اەرودرومدارعا باعىتتالدى.

British Airways اۋە كومپانياسى اۋەجايدىڭ ۋاقىتشا جابىلۋى الەم بويىنشا رەيستەر كەستەسىنىڭ ايتارلىقتاي وزگەرۋىنە اكەلەتىنىن مالىمدەدى.

ۇلى بريتانيانىڭ ەنەرگەتيكا ءمينيسترى ەد ميليبەند National Grid ەلەكتر جەلىسى كومپانياسى ەلەكتر ەنەرگياسىن مۇمكىندىگىنشە تەزىرەك قالپىنا كەلتىرۋ ءۇشىن بارلىق شارالاردى قولدانىپ جاتقانىن ايتتى. ونىڭ ايتۋىنشا، ءورتتىڭ ناقتى سەبەبى ءالى بەلگىسىز.

- بۇل سۇراققا جاۋاپ بەرۋ ءۇشىن ءالى تىم ەرتە. ءورتتىڭ نەدەن شىققانىن بىلمەيمىز. بۇل، ءسوزسىز، بۇرىن- سوڭدى بولماعان وقيعا، - دەدى مينيستر.

اۋەجاي وكىلىنىڭ مالىمدەمەسىنە سايكەس، ءورت ءسوندىرۋ توپتارى وقيعا ورنىندا جۇمىس ىستەپ جاتىر.

- ەلەكترمەن جابدىقتاۋدىڭ تولىق قالپىنا كەلتىرىلەتىن ۋاقىتى ازىرگە بەلگىسىز، - دەدى ول.

حەيس اۋدانىنداعى بۇل ءورت سالدارىنان لوندوننىڭ باتىسىنداعى مىڭداعان ءۇي جارىقسىز قالدى، ال 150 گە جۋىق ادام ەۆاكۋاتسيالاندى.

ەسكە سالا كەتەيىك استانا حالىقارالىق اۋەجايى جولاۋشىلارعا جەڭىستىڭ 80 جىلدىعىنا، سونداي-اق وتان قورعاۋشىلار كۇنىنە وراي وتەتىن اسكەري شەرۋگە دايىندىق جانە ونى وتكىزۋ كەزىندە ۇشۋ كەستەسىندە وزگەرىستەر بولۋى مۇمكىن ەكەنىن حابارلاعان ەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى