لوندوندا پالەستينانى جاقتاعان شەرۋ كەزىندە 100-دەن استام ادام ۇستالدى
لوندون پوليتسياسى سەنبى كۇنى 100-دەن استام ادامدى قاماۋعا الدى. ولاردىڭ باسىم كوپشىلىگى - پالەستيناعا قولداۋ كورسەتكەن شەرۋشىلەرگە شابۋىل جاساۋدى جوسپارلاعان اسىرە وڭشىل توپتاردىڭ مۇشەلەرى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
ءبىر كۇن بۇرىن اسىرە وڭشىل توپتار ءوز جاقتاستارىن قارسى دەمونستراتسياعا قاتىسۋعا شاقىردى. سەنبى كۇنى لوندون ورتالىعىندا ۇلتشىلدار مەن فۋتبول بۇزاقىلارى، قۇقىق قورعاۋ ورگاندارى قىزمەتكەرلەرى اراسىندا قاقتىعىستار بولدى.
پوليتسيانىڭ بولجامى بويىنشا پالەستينانى قولداۋ شەرۋىنە 300 مىڭعا جۋىق ادام قاتىستى. ال نارازىلىق اكسياسىن ۇيىمداستىرۋشىلار لوندون كوشەلەرىنە 800 مىڭ ادامدى جيناعانىن العا تارتادى.
بۇل جولعى بەسىنشى رەت وتكىزىلىپ جاتقان پالەستينانى قولداۋ شەرۋى ءبىرىنشى دۇنيەجۇزىلىك سوعىستىڭ سوعىس قيمىلدارىن اياقتاعان كومپەندىك بىتىمگە قول قويىلعان كۇن - قازا تاپقانداردى ەسكە الۋ كۇنىمەن تۇسپا- تۇس كەلدى.
لوندون پوليتسياسى پرەمەر- ءمينيستردىڭ، ىشكى ىستەر ءمينيسترى مەن ءبىرقاتار بريتاندىق ساياساتكەرلەردىڭ سوعىس ەسكەرتكىشتەرىنىڭ قورلانۋىنان جانە تارتىپسىزدىكتىڭ باستالۋىنان قاۋىپتەنگەنىنە قاراماستان، شەرۋگە تىيىم سالعان جوق.
شەرۋ گايد- پاركتەن باستالىپ، ورتالىق اسكەري ەسكەرتكىشتەرى ماڭىنان ءوتتى. ۇيىمداستىرۋشىلار شەرۋدىڭ سوڭى رەتىندە ا ق ش ەلشىلىگى عيماراتىنىڭ جانىنان تاڭدادى. سەنبى كۇنى ءتارتىپتى ساقتاۋ ءۇشىن لوندوندا 2000 پوليتسيا قىزمەتكەرى كەزەكشىلىكتە بولدى.
اۆتور
ەركەجان سماعۇلوۆا
