ۇلتتىق قورعا تاۋەلسىز اۋديت جۇرگىزىلەدى
ۇلتتىق قوردىڭ ينۆەستيتسيالىق كىرىسىن انىقتاۋ ءۇشىن تاۋەلسىز اۋديت جۇرگىزىلەدى. بۇل تۋرالى قارجى ۆيتسە-ءمينيسترى داۋرەن تەمىربەكوۆ ايتتى، دەپ حابارلايدى Kazinform.
«ۇلتتىق قور - بالالارعا» جوباسىن جىل سايىن ىسكە اسىرۋ كەزەڭ-كەزەڭىمەن ورىندالاتىن بولادى. ول ءۇشىن ەڭ الدىمەن وتكەن جىلدىڭ قورىتىندىسى بويىنشا ۇلتتىق قورعا تاۋەلسىز اۋديت جۇرگىزىلەدى. اۋديت ناتيجەسى بويىنشا ۇلتتىق قوردىڭ ينۆەستيتسيالىق كىرىسىنىڭ ءمانى مەن ونىڭ ەلۋ پايىزىنىڭ مولشەرى انىقتالادى»، - دەدى ۆيتسە-مينيستر ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
داۋرەن تەمىربەكوۆتىڭ سوزىنە قاراعاندا، مۇنان كەيىن ءبىرىڭعاي جيناقتاۋشى زەينەتاقى قورى جىل ىشىندە دۇنيەگە كەلگەن، قايتىس بولعان، ازاماتتىق العان جانە ازاماتتىقتى جوعالتقان بالالار سانىن ناقتىلايدى. دەرەكتەر تولىقتاي ناقتىلانعاننان سوڭ ۇلتتىق بانك كامەلەت جاسىنا جەتكەن بالالارعا تولەم جاساۋ ءۇشىن قاجەتتى سومانى ءبىرىڭعاي جيناقتاۋشى زەينەتاقى قورىنا اۋدارادى. ءبىرىڭعاي جيناقتاۋشى زەينەتاقى قورى قاراجاتتى بالالاردىڭ ماقساتقا ساي پايدالانۋى ءۇشىن ەكىنشى دەڭگەيلى بانكتە نەمەسە ۇلتتىق پوشتا وپەراتورىندا اشىلعان شوتىنا جىبەرەدى.
«بالالار تۇسكەن قاراجاتتى ءوز قالاۋىنشا ەكى ماقساتتا جۇمسايدى. ۇلتتىق قوردان بەرىلەتىن تولەمدەر سالىق سالۋدان بوساتىلادى. قاجەتتى نورمالار سالىق كودەكسىندە جەكە كوزدەلگەن»، - دەدى ول.
