ۇلتتىق قور - بالالارعا: جيناقتالعان سوما قانشالىقتى ءوستى
استانا. KAZINFORM - قارجى مينيسترلىگى مەن ۇلتتىق بانك «ۇلتتىق قور - بالالارعا» باعدارلاماسى اياسىندا جيناقتالاتىن قاراجاتقا تۇسىنىك بەردى.
بۇگىن سەناتتىڭ جالپى وتىرىسىندا دەپۋتات نۇرتورە ءجۇسىپ بيىل جىل باسىندا قازاقستان ازاماتى سانالاتىن بالالارعا ۇلتتىق قوردان العاشقى قاراجات جيناق قورىنا كەلىپ تۇسكەنىن، بۇل باعدارلاماعا قاتىسۋشىلاردىڭ جالپى سانى 6 ميلليون 919 مىڭ بالانى قۇراعانىن ەسكە سالدى.
- ۇلتتىق قوردان ماقساتتى ترانسفەرتتەر تارتۋ قوردىڭ اكتيۆتەرىنە جانە «ۇلتتىق قور - بالالارعا» باعدارلاماسىن جۇزەگە اسىرۋعا قالاي اسەر ەتەدى؟ ءبىز كەلەشەك ۇرپاقتىڭ نەسىبەسىنە قول سالىپ، قول سالعاندا - مول سالىپ وتىرعان جوقپىز با؟ 2024 -جىلدىڭ سوڭىنا دەيىن جانە كەلەر جىلدارى ءار بالاعا قانداي سوما اۋدارىلادى؟ - دەپ سۇرادى سەناتور.
ءوز كەزەگىندە قارجى ءمينيسترى ءمادي تاكيەۆ بيىل «ۇلتتىق قور - بالالارعا» جوباسى اياسىندا 1- اقپاندا 7 ميلليونعا جۋىق بالاعا 100 دوللار 52 سەنتتەن اۋدارىلعانىن ايتتى.
- قازىر (قورداعى قارجى) دوللارمەن ەسەپتەلەدى جانە وسى سوما قوسىمشا ينۆەستيتسيالانادى. سوندىقتان جيناق ءوسىپ جاتىر. ينۆەستيتسيالىق كىرىسكە توقتالساق، بيىل ءبىز 2,6 پايىزبەن سانادىق. كەلەسى جىلى %3 ينۆەستيتسيالىق ءوسىم بولادى دەپ بولجام جاساپ وتىرمىز. سوندىقتان ءبىز 1- قاڭتارداعى ساندى ەسكەرىپ، بالالارعا 118-120 دوللار بولاتىن شىعار دەپ وتىرمىز. ءبىراق ونى 1- اقپانعا دەيىن تاعى ءبىر ناقتى ەسەپتەۋ كەرەك، - دەدى قارجى ءمينيسترى.
ۇلتتىق بانك ءتوراعاسى تيمۋر سۇلەيمەنوۆتىڭ سوزىنە قاراعاندا، «ۇلتتىق قور - بالالارعا» جوباسى بويىنشا بالالارعا تيەسىلى سوما 890 ميلليون دوللارعا جەتكەن.
- الدىن الا ەسەپ بويىنشا جان باسىنا شاققاندا ءار بالاعا - 130 دوللار. ءمادي تاكيەۆ (قارجى ءمينيسترى) ايتقانداي، 1-قاڭتارعا دەيىن دۇنيەگە كەلگەن بالالار سانىن، ولاردىڭ قاي بولىگى 18 جاسقا تولعانىن ەسەپتەپ، ءتيىستى اقپاراتتى جاريالايمىز. جالپى بالالارعا ارنالعان وسى قاراجات ينفلياتسيادان قورعالعان، سەبەبى دوللارمەن ساقتالادى، - دەدى ۇب باسشىسى.
ەسكە سالا كەتەيىك، بيىل 1-قاڭتاردا «ۇلتتىق قور - بالالارعا» جوباسى رەسمي ىسكە قوسىلدى.
جوبا العاشىندا 7 ميلليوننان استام بالانى قامتىدى. وسى ورايدا Kazinform اگەنتتىگى 7 ميلليوننان استام بالانىڭ اتا- اناسىنا ارناپ، جوبانىڭ ەڭ ماڭىزدى تۇستارىن ءتىزىپ شىققان ەدى.
