ۇلتتىق قۇرىلتايدىڭ كەلەسى وتىرىسى قاي قالادا وتەدى
بۋراباي. KAZINFORM - مەملەكەت باسشىسى قاسىم-جومارت توقايەۆ ۇلتتىق قۇرىلتايدىڭ V وتىرىسىن قىزىلوردادا وتكىزۋدى ۇسىندى.
- سوڭعى جىلدارى ءبىز ۇلتتىق بىرەگەيلىگىمىزدىڭ ماڭىزدى فاكتورى - تاريح عىلىمىنىڭ دامۋىنا ەرەكشە كوڭىل ءبولىپ جاتىرمىز. بۇگىنگى قۇرىلتاي تاعى ءبىر تاريحي بەلەسكە تۇسپا-تۇس كەلدى. بيىل ەل استاناسىن قىزىلورداعا كوشىرۋ تۋرالى تاريحي شەشىمنىڭ قابىلدانعانىنا ءجۇز جىل تولىپ وتىر. وسى رەتتە قۇرىلتايدىڭ كەلەسى وتىرىسىن سىر بويىندا، كەزىندە قازاق ەلىنىڭ استاناسى بولعان قىزىلوردا قالاسىندا وتكىزۋدى ۇسىنامىن، - دەدى قاسىم-جومارت توقايەۆ.
سونداي-اق پرەزيدەنت ۇلتىمىزدىڭ «قازاق» اتاۋىن قايتا يەلەنگەنىنە 100 جىل تولعانىن ەسكە سالدى.
- حالقىمىزدىڭ «قازاق» دەگەن بايىرعى اتاۋى دا ءبىر عاسىر بۇرىن قايتارىلدى. ءبىزدىڭ مەملەكەتتىگىمىز مىڭجىلدىقتاردان باستاۋ الادى، ونىڭ تامىرى تىم تەرەڭدە جاتقانى داۋسىز. ءبىراق وسىدان ءبىر عاسىر بۇرىن ۇلتىمىزدىڭ ءوز اتاۋىنىڭ ورالۋى تاريحي ادىلدىك ورناتۋ جولىنداعى ماڭىزدى قادام بولعانىن اشىق ايتۋىمىز كەرەك. بۇل ىستە سول كەزدەگى ۇكىمەت باسشىسى ساكەن سەيفۋللين ايرىقشا ءرول اتقاردى. ول «قازاقتى قازاق دەيىك، قاتەنى تۇزەتەيىك» دەگەن ماقالا جازىپ، ارنايى يدەولوگيالىق ناۋقاندى باستاپ بەردى. مۇنداي ماڭىزدى وقيعالار ەل جادىندا ساقتالۋعا ءتيىس، - دەدى مەملەكەت باسشىسى.
ايتا كەتۋ كەرەك، قۇرىلتايدىڭ پانەلدىك سەسسيالارى كەشە باستالعان. ول سەكسيالاردىڭ تاقىرىپتارى ازاماتتىق قوعام، مادەنيەت، ونەر، رۋحانيات، ءبىلىم جانە عىلىم، الەۋمەتتىك-ەكونوميكالىق دامۋ ماسەلەلەرىن قامتىدى.
