ۇلتتىق قۇرىلتايدىڭ اياسىندا 2024-جىلى اتقارىلعان جۇمىستىڭ قورىتىندىسى جاسالدى
استانا. KAZINFORM - مەملەكەتتىك كەڭەسشى ەرلان قارين ۇلتتىق قۇرىلتاي مۇشەلەرىنىڭ قاتىسۋىمەن وتكەن باسقوسۋدا جىل بويى اتقارىلعان جۇمىستاردى قورىتىندىلادى، دەپ حابارلايدى اقوردانىڭ باسپا ءسوز قىزمەتى.
مەملەكەتتىك كەڭەسشى ۇلتتىق قۇرىلتاي مۇشەلەرى شىعىس قازاقستان جانە باتىس قازاقستان وبلىستارىندا كوشپەلى وتىرىس وتكىزىپ، جۇرتشىلىقپەن كەزدەسكەنىن تىلگە تيەك ەتتى. سونداي-اق وڭىرلىك قوعامدىق كەڭەستەر اتىنان كەلگەن ۇلتتىق قۇرىلتاي مۇشەلەرىمەن بولەك كەزدەسكەنىن اتاپ ءوتتى.
ەرلان قارين باستامالاردىڭ ورىندالۋ بارىسىنا توقتالىپ، قۇرىلتايدىڭ ءۇشىنشى وتىرىسىنىڭ قورىتىندىسى بويىنشا 40 بولىمنەن تۇراتىن ارنايى جوسپار قابىلدانعانىن ايتتى. مەملەكەتتىك كەڭەسشى ءقازىردىڭ وزىندە ولاردىڭ باسىم بولىگى ورىندالعانىن جەتكىزدى. اتاپ ايتقاندا، «تاۋەلسىزدىك جانە وتانشىلدىق»، «ادىلدىك پەن جاۋاپكەرشىلىك»، «ەڭبەكقورلىق پەن كاسىبي بىلىكتىلىك»، «زاڭ مەن ءتارتىپ»، «جاسامپازدىق جانە جاڭاشىلدىق» سياقتى جالپىۇلتتىق قۇندىلىقتاردى ورنىقتىرۋعا قاتىستى ەلەۋلى باستامالار بار.
ەرلان قارين مەكتەپتەردەگى جالپىۇلتتىق قۇندىلىقتارعا نەگىزدەلىپ جاڭارتىلعان تاربيە جۇمىسى جونىندەگى باعدارلاماعا ايرىقشا ءمان بەردى.
جيىندا وقۋ-اعارتۋ ءمينيسترى عاني بەيسەمبايەۆ ۇلتتىق قۇرىلتاي مۇشەلەرىنە بيىل 1-قىركۇيەكتەن باستاپ مەكتەپتەرگە ەنگىزىلگەن «ءبىرتۇتاس تاربيە» باعدارلاماسىنىڭ ارالىق ناتيجەسىن تانىستىردى. ال بالا قۇقىقتارى جونىندەگى ۋاكىل دينارا زاكيەۆا بالالاردىڭ قۇقىعىن قورعاۋ سالاسىندا مەملەكەت تاراپىنان جاسالعان شارالار تۋرالى باياندادى.
جالپىۇلتتىق قۇندىلىقتاردى دارىپتەۋ اياسىندا جىل بويى عىلىم مەن ءبىلىم، مادەنيەت پەن ونوماستيكا سالالارىندا ءبىرقاتار مەملەكەتتىك جانە قوعامدىق جوبالار مەن باستامالار جۇزەگە اسىرىلدى.
ۇلتتىق قۇرىلتايدىڭ جۇمىسىنداعى تاعى ءبىر باعىت - الەۋمەتتىك كەسەلمەن كۇرەس. بيىل پارلامەنت ايەلدەردىڭ قۇقىقتارىن جانە بالالاردىڭ قاۋىپسىزدىگىن قامتاماسىز ەتۋ، لۋدومانياعا قارسى ءىس-قيمىل، ۆانداليزممەن كۇرەس، ۆەيپكە تىيىم سالۋ ماسەلەلەرى بويىنشا ءبىرقاتار زاڭ قابىلداپ، ولارعا پرەزيدەنت قول قويدى. سونداي-اق بىرەر كۇن بۇرىن پارلامەنتتە ەسىرتكى بيزنەسىمەن كۇرەس تۋرالى زاڭ قابىلدانىپ، قۇجات پرەزيدەنتكە قول قويۋعا جولداندى. وسى زاڭداردىڭ بارلىعىن ازىرلەۋگە قۇرىلتاي مۇشەلەرى بەلسەندى اتسالىستى.
ەرلان قارين ۇلتتىق قۇرىلتاي مۇشەلەرىنە مەملەكەت باسشىسىنىڭ ءتورت اۋقىمدى ينفراقۇرىلىمدىق باستاماسىنىڭ جۇزەگە اسىرىلۋ ناتيجەلەرى تۋرالى مالىمەت بەردى. بۇل باستاما اتىراۋدا وتكەن ءۇشىنشى وتىرىستا جاريا ەتىلگەن بولاتىن.
جالپى، مەملەكەتتىك كەڭەسشى جىلدى قورىتىندىلاي كەلە، ۇلتتىق قۇرىلتايدىڭ ءتيىمدى ديالوگ الاڭى عانا ەمەس، سونداي-اق قوعامداعى وزەكتى ماسەلەلەردى كوتەرەتىن نەگىزگى ورتالىقتىڭ بىرىنە اينالعانىن اتاپ ءوتتى.
وسىعان دەيىن ەرلان قارينگە سۇراق قويعان قىتايلىق عالىم سىنعا ۇشىراعانى تۋرالى جازدىق.
