ۇلتتىق پاركتەر مەن رەزەرۆاتتاردا ورتكە قارسى ءىس-شارا ماردىمسىز ءجۇرىپ جاتىر - بەكتەنوۆ
استانا. KAZINFORM - ۇكىمەت باسشىسى ولجاس بەكتەنوۆ ەلىمىزدە وتالعان اعاشتاردى قايتا وڭدەۋگە ارنالعان جوعارى شيكىزات بازاسى بولا تۇرا، اعاشتاردىڭ وتىنعا اينالاتىنىن نەمەسە ساتىلىپ كەتەتىنىن ايتتى.
«ورماندى زاڭسىز كەسۋ جانە ورتتەن قورعاۋ شارالارىن قابىلداۋ قاجەت. بۇعان دەيىن ۇلتتىق پاركتەر مەن رەزەرۆاتتاردا ورتكە قارسى ءىس-شارالار ماردىمسىز جۇرگىزىلىپ كەلدى. وتكەن جىلدارى بولعان الاپات ورتتەر انىق كورسەتتى. ورماندى قورعاۋ ۇيىمدارى وعان دايىن بولماي شىقتى. قازىر ورمان شارۋاشىلىقتارىن، ساياباقتار مەن رەزەرۆاتتاردى ورتكە قارسى ارنايى جۇيەلەرمەن، تەحنيكامەن جانە جابدىقتارمەن قامتاماسىز ەتۋ بويىنشا اۋقىمدى جۇمىس قولعا الىندى. مىسالى، بۋراباي ۇلتتىق پاركىندە ورناتىلعان ەرتە حاباردار ەتۋ جۇيەسىنىڭ ارقاسىندا ورمان ورتتەرىنىڭ ورتاشا اۋدانى 50 ەسەگە قىسقاردى»، - دەدى ولجاس بەكتەنوۆ ۇكىمەت وتىرىسىندا.
سونداي-اق پرەمەر-مينيستر ورمانداردا سانيتارلىق تالاپتاردى ساقتاپ، اعاشتاردى زيانكەستەردەن قورعاۋ جۇمىسىن جەدەلدەتۋ كەرەكتىگىن ەسكە سالدى.
«بۇل جەردە ورتەنگەن نەمەسە اۋرۋعا شالدىققان اعاشتار تۋرالى ايتىپ وتىرمىز. ءبىز وسىنداي زاقىم كەلگەن جالپى اۋماقتىڭ تەك %1 ىن عانا كادەگە جاراتامىز. ال، ەلىمىزدە وتالعان اعاشتاردى قايتا وڭدەۋگە ارنالعان جوعارى شيكىزات بازاسى بولا تۇرا، ولار وتىنعا اينالادى نەمەسە ساتىلىپ، ءىزىم-عايىم جوق بولىپ كەتەدى. سوندىقتان وسى سالاعا الەۋەتتى ينۆەستورلاردى تارتۋ جۇمىسىن كۇشەيتۋ قاجەت. جالپى، ورمان قورىن ۇلعايتۋ جۇمىسىندا قاتاڭ باقىلاۋ مەن ءتيىستى ۇيلەستىرۋدى قامتاماسىز ەتۋ ماڭىزدى»، - دەيدى ول.
