ۇلتتىق ۆاليۋتاعا 30 جىل: بانكنوتالاردىڭ جاڭا سەرياسى تانىستىرىلدى
قازاقستان قارجىگەرلەرىنىڭ XI كونگرەسىندە ۇلتتىق ۆاليۋتا بانكنوتالارىنىڭ جاڭا سەرياسى تانىستىرىلدى، دەپ حابارلايدى Kazinform.
قازاقستان ۇلتتىق بانكىنىڭ بانكنوتالار مەن مونەتالار ديزاينى باسقارماسىنىڭ باس ديزاينەرى سانجار نۇرقاسىموۆتىڭ ايتۋىنشا، جاڭا بانكتونتتار «ساق ستيلى» ەلەمەنتتەرىنە نەگىزدەلگەن جانە كوشپەندىلەردىڭ بىرەگەي مادەنيەتىنەن باستاپ بۇگىنگى قازاقستانعا دەيىنگى ەل مۇراسىن بەينەلەيدى.
«جاڭا بانكنوتالار سەرياسى دايىن بولعان كەزدە اينالىمعا ەنەدى. نومينالى 5000 تەڭگەلىك جاڭا ديزاين ۇلگىسىندەگى العاشقى بانكنوتالار وسى جىلدىڭ سوڭىنا دەيىن قولدانىسقا شىعادى. حالىقارالىق تاجىريبەگە سايكەس، بانكنوتالاردىڭ ديزاينى جالعان اقشا جاساۋعا جول بەرمەۋ جانە ونىڭ الدىن الۋ ءۇشىن جەتىلدىرىلگەن قورعانىش قابىلەتىن ەنگىزۋ ماقساتىندا كەزەڭ- كەزەڭىمەن جاڭارتىلىپ وتىرادى. بۇل ورايدا ەلىمىزدىڭ مادەني قۇندىلىقتارى مەن تاريحىن ناسيحاتتاۋ ماڭىزدى سانالادى»، - دەدى ول.
ايتۋىنشا، جاڭا بانكنوتالار تولەمنىڭ بارلىق ءتۇرى بويىنشا قازاقستان رەسپۋبليكاسىنىڭ بۇكىل اۋماعىندا نومينالدى قۇنىنا قاراي قابىلداۋعا جاتادى.
«ەسكى جانە جاڭا ۇلگىدەگى بانكنوتالار اينالىمدا قاتار جۇرەتىن بولادى»، - دەپ ءتۇسىندىردى سانجار نۇرقاسىموۆ.
اۆتور
الما مۇقانوۆا
