ەلتاڭبا وزگەرگەن جاعدايدا، تەڭگە وزگەرە مە - ۇلتتىق بانك جاۋاپ بەردى
استانا. KAZINFORM - ۇلتتىق بانك قازاقستاننىڭ مەملەكەتتىك ەلتاڭباسىن وزگەرتۋ تۋرالى شەشىم قابىلدانعان جاعدايدا بانكنوتتار وزگەرۋى مۇمكىن بە دەگەن سۇراققا جاۋاپ بەردى.
«بانكنوتتار مەن مونەتالارداعى مەملەكەتتىك رامىزدەردى اۋىستىرۋ ماسەلەسى تۇپكىلىكتى شەشىم قابىلدانعاننان كەيىن جانە قازاقستان رەسپۋبليكاسىنىڭ ءتيىستى زاڭنامالىق اكتىلەرىنە قاجەتتى وزگەرىستەر مەن تولىقتىرۋلار ەنگىزىلگەننەن كەيىن قارالۋى مۇمكىن»، - دەلىنگەن ۇلتتىق بانكتىڭ Kazinform اگەنتتىگىنىڭ ساۋالىنا بەرگەن جاۋابىندا.
ۆەدومستۆو بۇل جەردە «قازاقستان رەسپۋبليكاسىنىڭ مەملەكەتتىك رامىزدەرى تۋرالى» زاڭ ءسوز ەتىلىپ وتىرعانىن ايتتى.
ەستەرىڭىزگە سالا كەتەيىك، قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ اتىراۋدا وتكەن ۇلتتىق قۇرىلتايدىڭ ءۇشىنشى وتىرىسىندا مەملەكەتتىك ەلتاڭبانى وزگەرتۋ تۋرالى ۇسىنىس ايتقان بولاتىن.
«جالپى حالىقتىق كەلىسىم بولسا، بارلىق اسپەكتىلەردى جان-جاقتى قاراستىرىپ، قوعامدىق تالقىلاۋ جۇرگىزەتىن ارنايى كوميسسيا قۇرىپ، قازاقستاننىڭ جاڭا مەملەكەتتىك ەلتاڭباسىنىڭ ەڭ ۇزدىك ەسكيزىنە اشىق كونكۋرس جاريالاۋعا بولادى»، - دەدى مەملەكەت باسشىسى.
