ەلەكتروموبيل يەلەرى تۇراقتا اقى تولەۋدەن بوساتىلادى - سەنات

اتالعان زاڭداردىڭ نەگىزگى ماقساتى - ەلىمىزدە ەكولوگيالىق تازا كولىكتى تانىمال ەتۋ جانە ەلەكتروموبيلدەرگە ارنالعان ينفراقۇرىلىمدى دامىتۋدىڭ قۇقىقتىق نەگىزدەرىن بەكىتۋ.

«2023-جىلدىڭ 1-قاڭتارىندا ەلىمىزدە ەلەكتر قوزعالتقىشپەن 812 جەڭىل كولىك تىركەلسە، قازىرگى كەزدە 9 مىڭنان استام ەلەكتر كولىگى بار. وسى دەرەكتەر ەلەكتروموبيل سانىنىڭ كۇن ساناپ ەسەلەنىپ وسكەندىگىن كورسەتىپ وتىر. بۇل دەگەنىمىز، مەملەكەت جاعىنان ەلەكتروموبيلدەرگە ارنالعان ينفراقۇرىلىمدى دامىتۋدى تالاپ ەتەدى»، - دەدى سەناتور سۇلتان دۇيسەمبينوۆ.

نەگىزگى زاڭدا كەلەسىدەي زاڭنامالىق نورمالار قاراستىرىلعان:

- ورتاق پايدالانىلاتىن جەر ۋچاسكەلەرىن ەلەكترموبيلدەر ءۇشىن بەرۋ، ەلەكترقۋاتتاۋ ستانسيالارىن ورنالاستىرۋ، ونىڭ ىشىندە ەرەكشە قورعالاتىن تابيعي اۋماقتار جەرلەرىندە ورنالاستىرۋ ماسەلەلەرى؛

- «ەلەكتروموبيل» جانە «ەلەكتروزاريادتى ستانسيا» ۇعىمدارىن ەنگىزۋ؛

- كوممۋنالدىق اقىلى اۆتوتۇراقتاردا ەلەكتروموبيل كولىگىنىڭ يەلەرى ءۇشىن تەگىن تۇراق ورىندارىن پايدالانۋ؛

- تۇرعىن ايماقتارداعى قۋاتتاۋ ستانتسيالارىن جوبالاۋ، ورناتۋ جانە تەحنيكالىق پايدالانۋ ەرەجەلەرىن ازىرلەۋ ءارى بەكىتۋ بويىنشا مەملەكەتتىك ورگانداردىڭ وكىلەتتىلىگىن انىقتاۋ؛

- جەرگىلىكتى اتقارۋشى ورگاندارعا ەلەكترقۋاتتاۋ ستانتسيالارىن ورنالاستىرۋ تۋرالى شەشىم قابىلداۋ، سونداي-اق ەلەكترقۋاتتاۋ ستانتسيالارى ءۇشىن ينجەنەرلىك ينفراقۇرىلىم ۇيىمداستىرۋدى قامتاماسىز ەتۋ بويىنشا وكىلەتتىكتەر بەرۋ.

«سونىمەن قاتار «اكىمشىلىك قۇقىق بۇزۋشىلىق تۋرالى قازاقستان رەسپۋبليكاسىنىڭ كودەكسىنە تولىقتىرۋ ەنگىزۋ تۋرالى» ىلەسپە زاڭ ەلەكتر جەلىلەرىنە ءوز بەتىنشە قوسىلعانى ءۇشىن، سونداي- اق ەلەكترقۋاتتاۋ ستانتسيالارىمەن جابدىقتالعان ورىنداردا كولىك قۇرالدارىن توقتاتۋ نەمەسە تۇراققا قويۋ ەرەجەلەرىن بۇزعانى ءۇشىن اكىمشىلىك جاۋاپكەرشىلىكتى ەنگىزۋ ماقساتىندا ازىرلەنگەن»، - دەدى دەپۋتات.

سەناتتىڭ اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ مالىمەتىنشە، «جول قوزعالىسى تۋرالى» زاڭعا «ەلەكترموبيل» ۇعىمى ەنگىزىلەدى.

ازاماتتاردىڭ مىناداي جەڭىلدىكتى ساناتتارىن كولىك قۇرالدارىنىڭ ورىنتۇراعىن پايدالانعانى ءۇشىن تولەماقىدان بوساتۋ ۇسىنىلدى: ۇلى وتان سوعىسىنىڭ ارداگەرلەرى، باسقا مەملەكەتتەردىڭ اۋماعىنداعى ۇرىس قيمىلدارىنىڭ ارداگەرلەرى، جەڭىلدىكتەرى بويىنشا ۇلى وتان سوعىسىنىڭ ارداگەرلەرىنە تەڭەستىرىلگەن ارداگەرلەر، ەڭبەك ارداگەرلەرى، ءى جانە Ⅱتوپتاعى مۇگەدەكتىگى بار ادامدار: مۇگەدەكتىگى بار بالانىڭ زاڭدى وكىلدەرى، كوپ بالالى انالار، سەمەي يادرولىق سىناق پوليگونىنداعى يادرولىق سىناقتاردىڭ سالدارىنان زارداپ شەككەن ازاماتتار، ەلەكترموبيلدەردىڭ يەلەرى.

مۇنىمەن قوسا، «Тb» جانە «D» ساناتتارىنىڭ جۇرگىزۋشىلەرىنە جوعارى سۇرانىس ماسەلەسىن شەشۋ ماقساتىندا اۆتوكولىك قۇرالدارىن باسقارۋعا رۇقسات بەرۋ ءۇشىن تالاپتار 23 جاستان باستالاتىن بولىپ جەڭىلدەتىلدى، سونداي- اق جۇرگىزۋشىنىڭ جۇمىس ءوتىلى 3 جىلعا دەيىن، «D1» كىشى ساناتىنا كەمىندە ءبىر جىلعا دەيىن قىسقارتىلدى.

اتالعان زاڭداردار كۇشىنە ەنسە، ەلىمىزدە ەلەكتروموبيلدەر سانىنىڭ ارتۋىنا جانە ارنايى ينفراقۇرىلىمدى دامىتۋعا ىقپال ەتەدى. بۇل ءوز كەزەگىندە قورشاعان ورتاعا كەلەتىن زالالدى ازايتىپ، حالىق اراسىندا جاسىل كولىكتەرگە دەگەن سۇرانىستى ارتتىرادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى