ەلدەگى زەينەتاقىنىڭ ورتاشا مولشەرى قانداي

بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتى حابارلادى. 2025 -جىلعى 1- ساۋىردەگى جاعداي بويىنشا زەينەتكەرلەر سانى - 2 ميلليون 465 مىڭ ادام.

- 2025 -جىلعى 1-ساۋىردەگى جاعداي بويىنشا جيىنتىق زەينەتاقىنىڭ ورتاشا مولشەرى 143622 تەڭگە، ونىڭ ىشىندە ىنتىماقتى زەينەتاقى مولشەرى — 95963 تەڭگە، بازالىق زەينەتاقى - 47659 تەڭگە بولدى، - دەلىنگەن حابارلامادا.

بۇدان بۇرىن حابارلانعانداي، 2025 -جىلعى 1-قاڭتاردا بازالىق زەينەتاقى تولەمىنىڭ مولشەرى ۇلتتىق بانك ايقىندايتىن ينفلياتسيانىڭ بولجامدى دەڭگەيىنە سايكەس %6,5 عا، ىنتىماقتى زەينەتاقى %8,5 عا، ياعني ينفلياتسيا دەڭگەيىنەن %2 عا وزا وتىرىپ ۇلعايتىلدى.

بۇدان باسقا مەملەكەت باسشىسىنىڭ تاپسىرماسى بويىنشا 2023 -جىلدان باستاپ بەس جىل ىشىندە ەڭ تومەن بازالىق زەينەتاقىنى ەڭ تومەن كۇنكورىس دەڭگەيىنىڭ %70 نا دەيىن، ەڭ جوعارى — %120 عا دەيىن جىل سايىن كەزەڭ-كەزەڭىمەن ارتتىرۋ جۇزەگە اسىرىلادى.

- 2025 -جىلعى 1- قاڭتاردان باستاپ بازالىق زەينەتاقىنىڭ ەڭ تومەن مولشەرى ەڭ تومەن كۇنكورىس دەڭگەيىنىڭ %65 نان %70 عا دەيىن ۇلعايتىلدى، بۇل 32360 تەڭگە، ونىڭ ەڭ جوعارى مولشەرى ەڭ تومەن كۇنكورىس دەڭگەيىنەن 105 تەن %110 عا دەيىن ارتتىرىلىپ، 50851 تەڭگە بولدى، - دەلىنگەن حابارلامادا.

2018 -جىلعى 1-شىلدەدەن باستاپ مەملەكەتتىك بازالىق زەينەتاقى تولەمى زەينەتاقى جۇيەسىندەگى ءوتىلىن ەسكەرە وتىرىپ، ءار الۋشىعا جەكە تاعايىندالاتىنىن ەسكە سالامىز.

بۇل رەتتە 1998 -جىلعى 1-قاڭتارداعى جاعداي بويىنشا ىنتىماقتى جۇيەدە جۇمىس ىستەگەن ۋاقىتى، سونداي-اق مىندەتتى زەينەتاقى جارنالارى تولەنگەن كەزەڭدەر زەينەتاقى جۇيەسىندەگى ەڭبەك وتىلىنە قوسىلادى.

ەگەر ازاماتتىڭ زەينەتاقى جۇيەسىندەگى ءوتىلى 10 جىل نەمەسە ودان از بولسا، سونداي- اق مۇلدە جوق بولسا، بازالىق زەينەتاقى ەڭ تومەنگى كۇنكورىس دەڭگەيىنىڭ %70 نا تەڭ بولسا، سودان كەيىن 10 جىلدان اسقان ءار جىل ءۇشىن ونىڭ مولشەرى %2 عا ارتادى. ال ەگەر ءسىزدىڭ ءوتىلىڭىز 20 جىل بولسا، بازالىق زەينەتاقى تومەنگى كۇنكورىس دەڭگەيىنىڭ %90 ى بولادى. ەڭبەك ءوتىلى 30 جىل نەمەسە ودان كوپ بولسا، كۇنكورىس دەڭگەيىنىڭ ەڭ جوعارعى مولشەرىندە ياعني %110 بەلگىلەنەدى.

ەگەر ءبىر اي ىشىندە مىندەتتى زەينەتاقى جارنالارى ءبىرىڭعاي جيناقتاۋشى زەينەتاقى قورىنا بىرنەشە رەت اۋدارىلسا، جيناقتاۋشى جۇيەگە قاتىسۋ مەرزىمى ءبىر اي.

وسىلايشا مىندەتتى زەينەتاقى جارنالارى نەعۇرلىم تۇراقتى جانە تولىق كولەمدە اۋدارىلاتىن بولسا، زەينەت جاسىنا جەتكەندە بازالىق زەينەتاقى تولەمدەرىنىڭ مولشەرى سوعۇرلىم كوپ بولادى.

ازاماتتىڭ جاسىنا بايلانىستى زەينەتاقى تولەمدەرىنىڭ مولشەرى 1998 -جىلعى 1- قاڭتارداعى جۇمىس وتىلىنە (كەم دەگەندە 6 اي قاجەت) جانە زەينەتكەرلىككە دەيىنگى كەزەڭدەگى ورتاشا ايلىق تابىسىنا بايلانىستى بولادى.

ايتا كەتەلىك ق ق س بويىنشا زەينەتاقى مەن جاردەماقى يندەكستەلەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى