ەلدەگى سيرەك مەتالدار تۋرالى مالىمەتتەر قۇپيا دەرەكتەر تىزىمىنەن شىعارىلادى

ۆەدومستۆو ماماندارىنىڭ پايىمىنشا، بۇل شارا ەلگە كەلەتىن ينۆەستيتسيانى مولايتىپ، تىڭ وندىرىستەردى اشۋعا مۇمكىندىك بەرەدى، دەپ حابارلايدى Kazinform.

اتالعان ۇسىنىس مينيسترلىك ازىرلەگەن «سيرەك جانە جەردە سيرەك كەزدەسەتىن مەتالدار سالاسىن دامىتۋدىڭ 2024-2028-جىلدارعا ارنالعان كەشەندى جوسپارى» جوباسىندا كورىنىس تاپقان.

«كەيبىر سيرەك مەتالدار مەن بارلىق سيرەك جەر مەتالىنىڭ بالانستىق قورى تۋرالى مالىمەتتەردى مەملەكەتتىك قۇپيالارعا جاتقىزۋ سالاعا ينۆەستيتسيا تارتۋ پروتسەسىنە تەرىس اسەر ەتەدى. بۇل اقپارات الەۋەتتى ينۆەستورلار ءۇشىن قولجەتىمدى بولۋى قاجەت. 2021-جىلعى تاجىريبە كورسەتكەندەي، ءبىرقاتار سيرەك مەتالدىڭ بالانستىق قورىن، سونىڭ ىشىندە ليتيدى قۇپياسىزداندىرۋ وسى سالاعا ينۆەستيتسيا تارتۋعا مۇمكىندىك بەردى. ناتيجەسىندە جەر قويناۋىن پايدالانۋشى قازاقستاندىق ەكى كاسىپورىن نەمىس كومپانياسىمەن ليتي كەن ورىندارىندا گەولوگيالىق بارلاۋ جۇمىستارىن جۇرگىزۋگە شارتتار جاساستى»، - دەپ جازىلعان اشىق ن ق ا سايتىندا جاريالانعان كەشەندى جوسپار جوباسىندا.

وسىلايشا مينيسترلىك وكىلدەرى سيرەك مەتالدىڭ جەكەلەگەن تۇرلەرىنەن قۇپيالىلىق رەجيمىن الىپ تاستاۋدى ۇسىنىپ وتىر.

جوسپار جوباسىندا بۇل شارا 2024-2025-جىلدارى ادىلەت مينيسترلىگى مەن ۇلتتىق قاۋىپسىزدىك قىزمەتىنىڭ ماقۇلداۋى نەگىزىندە شەشىمىن تابۋى كەرەكتىگى ايتىلعان.

قازاقستاننىڭ جەر قويناۋىندا ۆولفرام، موليبدەن، بەريلليي، تسيركونيي، گافني، نيوبي، تانتال، ۆيسمۋت، ليتي، سەزي جانە رەني سياقتى سيرەك مەتالداردىڭ قورى، سونداي-اق «سيرەك جەر مەتالى» دەيتىن ساناتقا جاتاتىن يتتري، لانتان، سەري، پرازەوديم، نەوديم، ساماري، ەۋروپي، گادوليني قورى كەزدەسەدى.

ولاردىڭ ىشىندە ينۆەستورلار ءۇشىن ەڭ تارتىمدىسى مىنالار:

- ۆانادي قورى (قۇرىمساق، بالا-ساۋىسقاندىق)؛

- تيتان جانە تسيركوني (قاراوتكەل، وبۋحوۆسكايا، شوقاش، شپاكوۆكا، قۇمكول، سابىندىكول، پروگنوزنوە، گوركوۆسكوە، بەرەزوۆسكوە، زاياچيا، درۋجبا، اقەسپە)؛

- تانتال مەن نيوبي ( جوعارعى ىرعىز، كۆارتسيەۆوە، جوعارعى-بايمۋرزين، قالاي-تاپقان)؛

- ليتي بويىنشا (يۋبيلەينوە، جوعارعى-بايمۋرزين، باكەن، بەلوگورسك، احمەتكينو، مەدۆەدكا)؛

- موليبدەن جانە ۆولفرام (كوكتەنكول، دروجيللوۆسكوە، جوعارعى قايراقتى، سميرنوۆسكوە، وڭتۇستىك جاۋىر، جانەت، باتىستاۋ، اقشاتا، قاراوبا، باينازار)؛

- بەريللي (نۇراتالدى، دارات).

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى