ەلدەگى 85 مەكتەپكە استاناداعى كانادا مەكتەبىنىڭ وزىق تاجىريبەسى ەنگىزىلۋى مۇمكىن
استانا. KAZINFORM - استانادا «Kosem 2025» كوشباسشىلار فورۋمى ءوتىپ جاتىر.
The Ulytau Educational Foundation قوعامدىق قايىرىمدىلىق قورى مەن استاناداعى حالىقارالىق كانادا مەكتەبىنىڭ ۇيىمداستىرعان ەكى كۇندىك ءىس-شارانىڭ پانەلدىك وتىرىسى ۇلتتىق مۋزەيدە ءوتتى.
فورۋمعا بيزنەس كوشباسشىلار، مەملەكەتتىك ورگاندار مەن كوممەرتسيالىق ەمەس مەكەمەلەردىڭ، قايىرىمدىلىق ۇيىمدارىنىڭ وكىلدەرى، ستۋدەنتتەر مەن وقۋشىلار، استاناعى جانە وڭىرلەردەگى مەكتەپ جەتەكشىلەرى شاقىرىلىپتى.
The Ulytau Educational Foundation قايىرىمدىلىق قورىنىڭ جەزقازعان قالاسىنداعى ايماقتىق وكىلدىگىنىڭ باسشىسى گۇلميرا جاپپاسوۆا فورۋم ءۇش وڭىردەگى 85 مەكتەپتىڭ باسىن قوسقانىن ايتادى.
- بۇل قور ءبىزدىڭ وڭىرگە 2021 -جىلى كەلدى. «قازاق مىس» كورپوراتسياسى وسى قورعا وڭىردەگى مەكتەپتەردىڭ ءبىلىم ساپاسىن ارتتىرۋعا ارنالعان باعدارلاما ازىرلەپ، ىسكە اسىرۋ تۋرالى تاپسىرىس بەرگەن بولاتىن. جەزقازعاننىڭ استانا، الماتى سياقتى ءىرى قالالاردان الشاق جاتۋى مۇعالىمدەردىڭ دە، وقۋشىلاردىڭ دا ءوز-ءوزىن دامىتۋىنا، وزگە وڭىردەگى ارىپتەستەرىمەن، زامانداستارىمەن تانىسىپ، زەيىن كوكجيەگىن كەڭەيتۋىنە ءبىراز كەدەرگى كەلتىرەدى. قور وسىمەن ءتورتىنشى جىل قاتارىنان ۇلىتاۋ وبلىسىنىڭ 50-دەن استام مەكتەبىمەن تىعىز جۇمىس ىستەپ كەلەدى. ونىڭ سىرتىندا قاراعاندى وبلىسىنىڭ بالقاش قالاسىنداعى بۇكىل مەكتەپتەر مەن اۋىل مەكتەپتەرى، جامبىل وبلىسى شۋ اۋدانىنداعى 6 مەكتەپ پەن 2 كوللەدجدە دە وسى باعدارلاما ىسكە اسىرىلىپ كەلەدى، - دەيدى ول.
اتالعان باعدارلاما اياسىندا پەداگوگتەردىڭ بىلىكتىلىگىن ارتتىرۋعا ارنالعان كۋرستار، وقۋشىلارعا ارنالعان اعىلشىن ءتىلىنىڭ قوسىمشا ساباقتارى، اعىلشىن ءتىلى مۇعالىمدەرىن ادىستەمەلىك سۇيەمەلدەۋ شارالارى ۇيىمداستىرىلادى. عىلىمي جوبالار مەن باعىتتار اياسىندا ينتەللەكتۋالدىق ويىندار وتكىزىلەدى. ول جوبالارعا جەتەكشىلىك ەتكەن بالالاردىڭ الدى شەتەلگە شىققان.
- تاعى ءبىر باعىت - كاسىبي باعدار بەرۋ. ونىڭ اياسىندا وقۋشىلارعا ماماندىق تاڭداۋ ماسەلەسىندە اقىل-كەڭەس بەرىلىپ، قولداۋ كورسەتىلەدى. بۇگىنگى «Kosem 2025» كوشباسشىلار فورۋمىن دا ءبىزدىڭ قوردىڭ ەڭ ءىرى ءىس-شارالارىنىڭ ءبىرى دەپ ايتا الامىن.
بيزنەستەگى ليدەرلەرمەن، ءوز سالاسىندا كوشباسشىعا اينالعان مۇعالىمدەرمەن كەزدەسۋ ارقىلى بالالاردىڭ وزىنە دەگەن سەنىمىن ارتتىرۋدى كوزدەپ وتىرمىز، - دەيدى گۇلميرا جاپپاسوۆا.
ايتۋىنشا، فورۋمعا وڭىرلەردەن شاقىرىلعان وقۋشىلار ءبىر اپتا بويى استاناداعى كانادا مەكتەبىندە ءدارىس تىڭداپ، ونداعى زامانداستارىمەن تانىسقان كورىنەدى.
- ەرتەڭ كانادا مەكتەبى مەن قور باعدارلاماسىنا قاتىسۋشى مەكتەپتەر اراسىندا ءوزارا ىنتىماقتاستىق تۋرالى مەموراندۋمدار بەكىتىلەدى. وسى ارقىلى استانا مەكتەبىنىڭ وزىق تاجىريبەسىن بىرنەشە وڭىرگە، اۋىل مەكتەپتەرىنە تاراتۋ مۇمكىندىگى تۋىنداپ وتىر.
كانادا مەكتەبىمەن اراداعى بايلانىستى ارقاسىندا ءبىزدىڭ مەكتەپتەردە ترانسفورماتسيا ءجۇرىپ جاتقانىن ناقتى كورىپ وتىرمىز. ول مەكتەپتەردە اعىلشىن ءتىلى ءپانى كانادا مەكتەبىنىڭ تاجىريبەسى بويىنشا وقىتىلادى. سونىڭ ارقاسىندا IELTS تەستىلەۋدەن 7,5 بالعا دەيىن باعا العان وقۋشىلارىمىز بار، - دەيدى قايىرىمدىلىق قورىنىڭ وكىلى.
فورۋمعا شاقىرىلعان قوناقتاردىڭ اراسىندا ءماجىلىس دەپۋتاتى مۇرات ابەنوۆ تە بولدى.
- بۇل فورۋمنىڭ تاقىرىبى ماعان ەرەكشە جاقىن. ويتكەنى نەگىزگى ماماندىعىم - ينفورماتيكا ءپانىنىڭ مۇعالىمى. ەڭبەك جولىم وسى باعىتتان باستالعان. كەيىن سول كەزدەگى ءبىلىم جانە عىلىم ءمينيسترىنىڭ ورىنباسارى بولىپ جۇرگەن ۋاقىتتا دا جاستاردىڭ كوشباسشىلىق قابىلەتىن دامىتۋ ماسەلەسىمەن تىكەلەي اينالىسقانىم بار. وقۋشىعا مەكتەپ قابىرعاسىندا بەرىلەتىن ءبىلىم ناقتى ءومىردىڭ مىسالدارىمەن بىرگە ءسىڭىرىلۋى كەرەك. وزىق مەملەكەتتەردىڭ ءبارى وسى باعىتتا العا قارىشتاپ كەتتى. سونداي وزىق ءتاسىلدىڭ ءبىرى - كوشباسشىلىق قاسيەتتى بالا بويىنان جەتكىنشەك شاعىندا-اق وياتىپ، جەتىلدىرۋ، - دەدى دەپۋتات.
ۇلىتاۋ، قاراعاندى جانە جامبىل وبلىستارىنداعى زامانداستارىن شەت ءتىلىن مەڭگەرۋدىڭ الەمدەگى وزىق تاسىلدەرىنە باۋلىپ جۇرگەن ارۋجان مالىكتىڭ اڭگىمەگە تارتتىق. استاناداعى حالىقارالىق كانادا مەكتەبىنىڭ 9-سىنىپ وقۋشىسى وقۋشىسى شالعايداعى زامانداستارى مەن ءىنى-قارىنداستارىنا ءوز بىلگەنىن ۇيرەتۋ ارقىلى ءوز ءبىلىمىن دە ساناعا بەكىتە تۇسكەنىن ايتادى.
- مەن شالعا مەكتەپتەردىڭ وقۋشىلارىنا ونلاين بايلانىس ارقىلى كوشباسشىلىق باعىتىنداعى تاجىريبەمدى عانا ۇيرەتىپ قويماي، اعىلشىن تىلىنەن قوسىمشا ۇيىرمە جۇرگىزەمىن. سونىڭ ارقاسىندا مەن جەتەكشىلىك جاساعان كەيبىر وقۋشىلار شەتەلگە وقۋعا ءتۇسىپ كەتتى. مەن دە وسىنىڭ ارقاسىندا قالاعان وقۋىما جولداما الىپ وتىرمىن، - دەيدى ارۋجان.
The Ulytau Educational Foundation» قوعامدىق قايىرىمدىلىق قورىنىڭ ديرەكتورى مارينا حان «قازاق مىس» قارجىلاندىرىپ وتىرعان بۇل جوبا بىرنەشە وڭىردەگى مونو قالانىڭ ادامي كاپيتالىن دامىتىپ جاتقانىن ايتادى.
- بىزدەگى مونو قالالاردىڭ حالقى جاپپاي كوشىپ جاتىر. ال قازاقستان ەكونوميكاسىندا مونو قالالاردىڭ الاتىن ورنى ەرەكشە. وسى قالالاردى ءبىلىم ساپاسىن كوتەرۋ ارقىلى عانا ورنىقتى دامىتا الامىز. «قازاق مىستىڭ» باستاماسى بويىنشا 5 جىلدىڭ باعدارلاما ازىرلەگەنبىز. وسى ەكىجاقتى بايلانىستىڭ جەمىسىن كورگەن وزگە دە تاۋ-كەن كاسىپورىنداردىڭ وكىلدەرى بۇگىنگى فورۋمعا قاتىسىپ وتىر. كەلەشەكتە ولار دا ءوز وڭىرلەرىندە وسىنداي يگى ىستەرگە قولداۋ كورسەتەدى دەگەن ءۇمىتىمىز بار، - دەيدى مارينا حان.
جوبا اۆتورلارى بۇل فورۋمدى ءداستۇرلى ءىس-شاراعا اينالدىرماقشى.
ايتا كەتەيىك، كەلەسى وقۋ جىلىنان باستاپ باستاۋىش جانە ورتا سىنىپ وقۋشىلارى جاڭا ءبىلىم ستاندارتىنا كوشەدى.
اۆتور
ەسىمجان ناقتىباي
