ەلدوس سمەتوۆ: مەملەكەتتىك قىزمەتكە بارمايمىن، تاعى ءبىر وليمپياداعا قاتىسامىن

ە. سمەتوۆ «جىلدىڭ ۇزدىك سپورتشىسى» اتاعىن 2-3 رەت العانىن ايتتى.

- ءار ادامنىڭ ءوزىنىڭ سۇيىكتى ءىسى بولادى. مىسالى مەن 5 جاسىمنان بەرى وسى سپورتپەن اينالىسىپ كەلەمىن، ودان ءبىر ناتيجە شىعارعىم كەلەدى، ەڭ بيىك شىڭىنا شىققىم كەلەدى. شىققان ادامدارعا قارايمىن، ولارداي بولۋ ءۇشىن نە ىستەۋ كەرەك دەپ كوپ زەرتتەۋلەر جاسادىم. بۇل شىڭعا دا شىقتىق، ءبىراق ادامي قاسيەتتى جوعالتىپ الماۋ كەرەك. باياعى ەلدوس - سول ەلدوس، تەك وليمپيادا چەمپيونى دەگەن اتتى يەلەندىك. ومىردەگى باستى ماقسات - دۇنيە مەن اتاق جيناۋ ەمەس، ادام بولىپ قالۋ، - دەدى سپورتشى تىلشىلەرگە بەرگەن سۇحباتىندا.

سونىمەن بىرگە، «ەلدوس سمەتوۆتى مەملەكەتتىك لاۋازىمدا كورۋىمىز مۇمكىن بە؟» دەگەن سۇراق قويىلدى.

- قازىرگى ۋاقىتتا ونداي ماقساتىم جوق، ءوزىمدى ول جاقتا كورىپ تۇرعان جوقپىن. ويتكەنى مەن ءالى سپورتشىمىن، سپورتشى رەتىندە العا قويعان ماقساتىم بار. سول ماقساتپەن مۇمكىندىگىم بار كەزدە اينالىسۋىم كەرەك. قازىر 32 جاستامىن، وليمپيادا ۋاقىتىندا 35-36 جاستا بولامىن. بۇل جاستا «جۇلدە الۋ مۇمكىن ەمەس» دەپ ءۇمىت ۇزۋگە بولمايدى، وعان دالەل بولعان - دەمەۋ جادىرايەۆ، ول 35 جاسىندا وليمپيادا فينالىنا دەيىن جەتتى. ءبىر قازاق شىققان بيىككە ەكىنشى قازاق تا شىعا الادى. مۇنداعى ماقسات - جاس دەگەننىڭ اۋىسىپ جاتقان سيفرلار عانا ەكەنىن دالەلدەۋ، جاستارعا مۇمكىن ەمەس نارسەنىڭ جوق ەكەنىن دالەلدەۋ. اسىرەسە ءۇشىنشى وليمپيادام - ءبىراز جاسقا ۇلكەن موتيۆاتسيا بەردى، كۇرەستى قويىپ كەتكەندەر كىلەمگە ورالدى، ديۋزدو زالىنان باپكەرلەر حابارلاسىپ، كىشكەنتاي بالالار سىيماي جاتقانىن ايتۋدا. بۇرىن «قازاققا دزيۋدودان وليمپيادا چەمپيونى بولۋ بۇيىرماعان، مۇمكىن ەمەس دەپ ويلايتىن ەدىم. ءبىراق بۇل مۇمكىن ەكەن، - دەپ جاۋاپ بەردى ەلدوس سمەتوۆ.

سونىمەن بىرگە، سپورتشى اعىلشىن ءتىلىن ۇيرەنۋگە انگلياعا باراتىنىن، 2027-جىلى قازاقستاندا وتەتىن الەم بىرىنشىلىگىنە، 2028-جىلى لوس-اندجەلەس قالاسىندا وتەتىن وليمپياداعا قاتىساتىنىن ايتتى.

- باعىما بۇيىرىپ جاتسا، بارامىن، بۇيىرماي جاتسا، باۋىرلارىمدى قولداۋعا بارامىن. مامان بولسام دا سپورتتان الىستاپ كەتپەيمىن. ويتكەنى كىشكەنتايىمنان سپورتپەن اينالىستىم، وسى سالاداعى كەمشىلىكتەردىڭ ورنىن تولتىرىپ، تاجىريبەمدى جاستارمەن بولىسكىم كەلەدى، - دەيدى ە. سمەتوۆ.

ايتا كەتەيىك، تۋريزم جانە سپورت مينيسترلىگى جىل سايىنعى «ۇزدىك» پرەمياسىنىڭ جەڭىمپازدارىن ماراپاتتادى. جەڭىمپازدار قاتارىندا پاريج وليمپياداسىنىڭ چەمپيوندارى، اۋىل ماماندارى جانە ۇزدىك سپورت ۇيىمدارى بار.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى