لۋدومانياعا شالدىققانداردىڭ تەك %8,3 قۇمار ويىندارعا تاۋەلدىلىگىن مويىندايدى
استانا. KAZINFORM - الەمدە ەرەسەكتەر اراسىندا قۇمار ويىندارعا تاۋەلدىلىكتىڭ تارالۋى 0,12 پايىزدان 5,8 پايىزعا دەيىن جەتەدى.
بۇل تۋرالى پارلامەنت ءماجىلىسى جانىنداعى قوعامدىق پالاتانىڭ وتىرىسىندا دەنساۋلىق ساقتاۋ مينيسترلىگى رەسپۋبليكالىق پسيحيكالىق دەنساۋلىق عىلىمي- پراكتيكالىق ورتالىعى باس ديرەكتورىنىڭ ورىنباسارى داۋلەت بايپەيىسوۆ ايتتى.
«ءبىز بۇل سالاداعى 24 زەرتتەۋگە شولۋ جاسادىق. بۇل 2022 -جىلعى مەتا-تالداۋ جانە وندا ءتيىستى ناتيجەلەر جيناقتالعان. ماسەلەن، الەمدە ەرەسەكتەر اراسىندا لۋدومانيانىڭ تارالۋى 0,12 پايىزدان 5,8 پايىزعا دەيىن. سونىمەن قاتار، ەرەسەك ادامداردىڭ شامامەن %12,5 تۇراقتى تۇردە وينايدى»، - دەدى د. بايپەيىسوۆ ويىن بيزنەسى مەن لوتەرەيا قىزمەتىن رەتتەۋ تاقىرىبىنا ارنالعان وتىرىستا.
ونىڭ ايتۋىنشا، لۋدومانيا بەلگىلەرى بار ادامداردىڭ تەك %8,3 عانا قۇمار ويىندارعا تاۋەلدىلىكپەن بايلانىستى پروبلەمالارى بار ەكەنىن مويىندايدى.
«وسى ماتەماتيكالىق مودەلدەۋ ارقىلى بۇل حالىقارالىق زەرتتەۋ ناتيجەسىن ەلىمىزدەگى جاعدايعا كوشىرسەك، مىناداي كورىنىس شىعادى: قازاقستاندا اتالعان پروبلەمانىڭ تارالۋى 442 مىڭ ادامعا دەيىن جەتۋى مۇمكىن. ونىڭ ىشىندە پروبلەمانى مويىندايتىندار - 36 مىڭعا جۋىق ادام»، - دەدى داۋلەت بايپەيىسوۆ.
ەسكە سالساق، جاقىندا پارلامەنت ماجىلىسىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ويىن بيزنەسى، لوتەرەيالار جانە لوتەرەيا قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تانىستىرىلدى.
ەلىمىزدە 400 مىڭداي ادام بۋكمەكەرلەر مەن كازينولاردىڭ تۇراقتى كليەنتىنە اينالعان.
