پلاسيدو دومينگو - ديماش قۇدايبەرگەن دۋەتى: بۋداپەشتە تۇساۋكەسەر ءوتتى

تىكەلەي ەفير حالىقارالىق جوبانىڭ YouTube ارناسىندا كورسەتىلدى.

كونكۋرس ساحناسىندا الەمگە تانىمال قوس جۇلدىز - قازاقستاندىق جاس ءانشى ديماش قۇدايبەرگەن مەن يسپانيالىق وپەرا ءانشىسى پلاسيدو دومينگو دۋەت بولىپ ونەر كورسەتتى. ولار جورج بيزەنىڭ 1863-جىلعى «The pearl Fishers» وپەراسىن ورىندادى.

پ. دومينگو بۇل جوبادا - حالىقارالىق قازىلار القاسىنىڭ ءتوراعاسى. بيىل العاش رەت تورەشىلەر قۇرامىنا د. قۇدايبەرگەن دە ەندى.

«بۋداپەشكە ومىرىمدە ءبىرىنشى رەت كەلدىم. ءدال وسى جەردە مەنىڭ ارمانىم ورىندالعالى جاتىر. ويتكەنى ءومىر بويى ويىمدا جۇرگەن، بالا كەزىمنەن ءبىر ارمانىم بار ەدى. ول - پلاسيدو دومينگومەن كەزدەسۋ، ونىمەن بىرگە جۇمىس ىستەۋ بولاتىن. مەن وعان بىلاي دەپ ايتتىم: «مەنىڭ مۋزىكاعا كەلۋىمە ءسىز سەبەپكەر بولدىڭىز». 5 جاسار كەزىمدە مەندە ونىڭ كونسەرتى جازىلعان VHC (ۆيدەوكاسسەتا) بولعان. سول كەزدەن بەرى ەكەۋىمىزدىڭ كەزدەسەتىنىمىزگە سەنىپ كەلدىم. مىنە، بۋداپەشتە مەنىڭ سول ارمانىم ورىندالدى. سول ءۇشىن بۋداپەشتى جاقسى كورەمىن»، - دەگەن بولاتىن د. قۇدايبەرگەن Virtuosos talent_show جوباسى اياسىندا بەرگەن سۇحباتىندا.

بۇگىنگى اقتىق كەزەڭدە 5 ەلدەن 6 قاتىسۋشى ونەر كورسەتتى: ماجارستاننان ادام بالوگ (فورتەپيانو) پەن الي لۋگوشي (كلارنەت)؛ پولشادان مالگوجاتا تسەشكو (گوبوي)؛ سلوۆاكيادان نينا بوچكاەۆا (سكريپكا)؛ ۋكراينادان تيموفەي جەرەبتسوۆ (فورتەپيانو)؛ چەحيادان كاتەرجينا شۆەتسوۆا (سكريپكا).

Virtuosos V4+ فينالىنىڭ ەكىنشى بولىگى 26- قاڭتارعا جوسپارلانعان.

ايتا كەتەيىك، بيىلعى 4- مامىردا بۋداپەشتە ديماشتىڭ جەكە كونسەرتى وتەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى